Citigroup banki koronavirusga qarshi vaksinalar tarqalsa, dollar 20 foizga tushishini kutmoqda

Citigroup banki koronavirusga qarshi vaksinalar tarqalib, jahon iqtisodiyoti tiklangan taqdirda dollar kursi 20 foizga tushib ketishini prognoz qilmoqda, deb yozadi “Kommersant”.

Tahlilchilar fikricha, vaksinatsiya xalqaro savdoni jonlantiradi. Ekspertlar 2001-yilgi tajribadan xulosa chiqarmoqda, o‘shanda Xitoyning Jahon savdo tashkilotiga qo‘shilishi globalizatsiyaga imkoniyat yaratgan va dollar shundan keyin bir necha yillar davomida pasayib borgan edi.

Vaksina tarqalishidan tashqari, AQSh Federal zaxira tizimining ehtiyotkorona siyosati ham dollar kursiga ta’sir qilishi mumkin. Tahlilchilar fikricha, dunyoda vaziyat normallashganidan keyin investorlar boshqa bozorlarga o‘ta boshlaydi.

Citigroup valyutaning 1985-yildan buyon eng keskin tarzda pasayishini kutmoqda. O‘shanda dollarning olti asosiy valyuta savatiga nisbatan hisobga oladigan DXY indeksi 18,5 foizga tushib ketgan edi. Dollarning o‘nta asosiy valyutaga nisbatan dinamikasini aks ettiruvchi Bloomberg Dollar Spot Index mart oyidan buyon 11 foizga pasaygan.

Avvalroq Xitoy, Yaponiya, Janubiy Koreya, Avstraliya, Yangi Zelandiya va ASEAN mamlakatlari Keng ko‘lamli mintaqaviy iqtisodiy sheriklik haqida bitim imzolagan edi. Uning ratifikatsiya qilinishi dunyodagi eng yirik erkin savdo zonasi yaratilishiga olib keladi.

Eslatib o‘tamiz, Moderna kompaniyasi o‘zining koronavirusga qarshi vaksinasi 94,5 foiz samaradorlik ko‘rsatganini e’lon qilganidan keyin AQSh fond bozorida keskin o‘sish kuzatildi. Asosiy birja indekslaridagi o‘sishlar bir hafta oldin AQShning boshqa bir kompaniyasi Pfizer va BioNTech kompaniyasi tomonidan yaratilgan vaksina 90 foiz samarali ekanligini e’lon qilinganidan keyin qayd etilgan o‘sishdan ko‘ra pastroq bo‘lgan.