Toshkent shahridagi aksariyat chorrahalar 18-noyabr, chorshanba kuni tushdan so‘ng 10 ballik (qizil darajadagi) tirbandliklar ichida qoldi. Bu haqda “Yandeks.Tirbandliklar” servisi ma’lumot bermoqda.

Skrinshot: “Yandeks.Xarita”

Servis prognoziga ko‘ra, yo‘llardagi murakkab vaziyat yaqin to‘rt soat davomida (qizil darajada) saqlanib qoladi.

Soat 21:00 da tirbandliklar darajasi 4 ball (sariq daraja)gacha, 22:00 da esa 3 ball (yashil daraja)gacha pasayishi kutilmoqda.

Waze servisi ma’lumotlariga ko‘ra, avtomobillar shoh ko‘chalarda soatiga 20—30 kilometr tezlikda harakatlanishga majbur bo‘lmoqda.

Ijtimoiy tarmoq foydalanuvchilari shahar bo‘ylab yuzaga kelgan tirbandliklar haqida video va fotomateriallarni bo‘lishmoqda.

Eslatib o‘tamiz, Yandeks.Tirbandliklar xizmati Toshkentda 2019-yildan boshlab ishga tushgan. Ko‘chalarning qanchalik bandligini baholash uchun Yandeks turli manbalardan olingan ma’lumotlardan foydalanadi. Anonim va umumlashtirilgan ma’lumotlar Yandeks Xaritalar, Yandeks Navigator foydalanuvchilari va hamkor kompaniyalarning mashinalaridan keladi.

Ma’lumotlar haydovchi haqidagi ma’lumotlarni o‘z ichiga olmaydi, faqat transport vositasining joylashuvi, yo‘nalishi va tezligini ko‘rsatadi. Harakat tezligi bo‘yicha tizim avtomobil tirbandlikda yoki odatdagidek harakatlanayotganligini avtomatik ravishda aniqlaydi.

Xizmat tirbandliklarni 10 ballik tizimda o‘lchaydi. Bunda 0 dan 3 ballgacha – yo‘llarda harakat erkin, 4-6 ball – transport harakati murakkablashgan, 7-10 ball esa yo‘llarda jiddiy tirbandliklar kuzatilayotganini anglatadi.