Qashqadaryo viloyatida Nexia va Spark o‘rtasida YTH sodir bo‘lgan. Haydovchilar o‘zaro gaplashib turganida ularning yoniga o‘tkinchi kelib, haydovchilarning biri bilan janjallashib ketdi, deya xabar bermoqda viloyat hokimligi.
Ma’lum qilinishicha, 2020-yil 3-noyabr kuni soat 12:30 larda Yorboboyev Yunus Nexia-2 rusumli avtomashinasida “Yangi Kesh” bozori yonidan burilib, 30 metr harakatlanib borib, yo‘lning chap tomonidagi avtomashinalar turar joyiga kirish uchun to‘xtab turgan Uzoqov Obidjon boshqaruvidagi Spark’ni orqa tomonidan urib yuboradi. Oqibatda faqatgina avtomashinalarga shikast yetadi.
Haydovchilar Yu.Yorboboyev va O.Uzoqovlar avtomashinadan tushib, o‘zaro gaplashib turganida o‘tkinchi Bo‘riyev Jasurbek ularning oldiga kelib, “o‘zaro kelishinglar, hozir YXHB xodimlari kelib, ikkalaringni ham olib ketadi” deb aytadi.
Shu vaqtda Yu. Yorboboyev hamda J.Bo‘riyev o‘rtasida janjal chiqadi va J.Bo‘riyev qo‘lidagi ichimlik shishasi bilan Yu.Yorboboyevning boshiga urib, tan jarohati yetkazadi.
Oqibatda Yu.Yorboboyev tan jarohati olib, Kitob tumani Tibbiyot birlashmasi Shoshilinch tibbiy yordam bo‘limiga murojaat qilib, davolanish uchun yotqiziladi.
Kitob tumani Tibbiyot birlashmasi shifokori A. Yusupov tomonidan 3-noyabr kuni berilgan ma’lumotnomada Yu.Yorboboyevning tanasida yopiq kalla miya shikasti, bosh miya chayqalishi, boshni tepa sohasida yumshoq to‘qimalarni lat yeyishi ko‘rinishida tan jarohatlari borligi ko‘rsatilgan.
Ushbu holat bo‘yicha tergovga qadar tekshiruv harakatlari olib borilib, 11-noyabr kuni Yu.Yorboboyev shifoxonadan chiqqanligi sababli sudga oid tibbiy ekspertiza ko‘rigidan o‘tkazilgan.
To‘plangan hujjatlar Shahrisabz shahar IIB huzuridagi Tergov bo‘linmasi ish yurituvida bo‘lib, sudga oid tibbiy ekspertiza xulosasi olingach, jinoyat ishi qo‘zg‘atish yoki qo‘zg‘atmaslik masalasi ko‘rib chiqiladi.
Avvalroq Yangiyerda bir yigit uch kishi tomonidan ayovsiz kaltaklangani, Andijonda avtomobilida YTH sodir qilgan IIB xodimi kaltaklangani hamda Jizzaxda mast o‘tkinchi YHXB xodimini do‘pposlagani haqida xabar berilgandi.
Izoh (0)