Қашқадарё вилоятида Nexia ва Spark ўртасида ЙТҲ содир бўлган. Ҳайдовчилар ўзаро гаплашиб турганида уларнинг ёнига ўткинчи келиб, ҳайдовчиларнинг бири билан жанжаллашиб кетди, дея хабар бермоқда вилоят ҳокимлиги.
Маълум қилинишича, 2020 йил 3 ноябрь куни соат 12:30 ларда Ёрбобоев Юнус Nexia-2 русумли автомашинасида «Янги Кеш» бозори ёнидан бурилиб, 30 метр ҳаракатланиб бориб, йўлнинг чап томонидаги автомашиналар турар жойига кириш учун тўхтаб турган Узоқов Обиджон бошқарувидаги Spark’ни орқа томонидан уриб юборади. Оқибатда фақатгина автомашиналарга шикаст етади.
Ҳайдовчилар Ю.Ёрбобоев ва О.Узоқовлар автомашинадан тушиб, ўзаро гаплашиб турганида ўткинчи Бўриев Жасурбек уларнинг олдига келиб, «ўзаро келишинглар, ҳозир ЙХҲБ ходимлари келиб, иккаларингни ҳам олиб кетади» деб айтади.
Шу вақтда Ю. Ёрбобоев ҳамда Ж.Бўриев ўртасида жанжал чиқади ва Ж.Бўриев қўлидаги ичимлик шишаси билан Ю.Ёрбобоевнинг бошига уриб, тан жароҳати етказади.
Оқибатда Ю.Ёрбобоев тан жароҳати олиб, Китоб тумани Тиббиёт бирлашмаси Шошилинч тиббий ёрдам бўлимига мурожаат қилиб, даволаниш учун ётқизилади.
Китоб тумани Тиббиёт бирлашмаси шифокори А. Юсупов томонидан 3 ноябрь куни берилган маълумотномада Ю.Ёрбобоевнинг танасида ёпиқ калла мия шикасти, бош мия чайқалиши, бошни тепа соҳасида юмшоқ тўқималарни лат ейиши кўринишида тан жароҳатлари борлиги кўрсатилган.
Ушбу ҳолат бўйича терговга қадар текширув ҳаракатлари олиб борилиб, 11 ноябрь куни Ю.Ёрбобоев шифохонадан чиққанлиги сабабли судга оид тиббий экспертиза кўригидан ўтказилган.
Тўпланган ҳужжатлар Шаҳрисабз шаҳар ИИБ ҳузуридаги Тергов бўлинмаси иш юритувида бўлиб, судга оид тиббий экспертиза хулосаси олингач, жиноят иши қўзғатиш ёки қўзғатмаслик масаласи кўриб чиқилади.
Аввалроқ Янгиерда бир йигит уч киши томонидан аёвсиз калтаклангани, Андижонда автомобилида ЙТҲ содир қилган ИИБ ходими калтаклангани ҳамда Жиззахда маст ўткинчи ЙҲХБ ходимини дўппослагани ҳақида хабар берилганди.
Изоҳ (0)