Armaniston Rossiya orqali Ozarbayjonga murojaat qilib, 25-noyabrgacha Kelbajar tumanidan qo‘shinlari va oddiy fuqarolarini chiqarib ketish uchun muhlat berishni so‘radi. Bu haqda respublika prezidenti yordamchisi Hikmat Gajiyev ma’lum qildi, deb yozadi “RBK”.
Boku “insoniylik yuzasidan” Yerevanga o‘n kun muhlat berishga rozi bo‘ldi.
“Kelbajardan Armanistonga olib boradigan yagona yo‘lning bandligini va ob-havo sharoitlarini hisobga olib, Ozarbayjon Armanistonning iltimosiga rozi bo‘ldi”, — dedi Gajiyev.
Armaniston Ozarbayjon bilan kelishuvga ko‘ra, 20-noyabrgacha Kelbajardan tashqari, Agdam tumanini va Gazax tumanidagi hududlardan, 1-dekabrgacha esa Lachin tumanidan chiqib ketishi kerak. Gajiyevning so‘zlariga ko‘ra, bu hududlar uchun muddatlar o‘zgarishsiz qoladi.
Tog‘li Qorabog‘da Ozarbayjon va Armaniston o‘rtasidagi jangovar harakatlar 27-sentabr kuni qayta boshlandi. Ikkala davlat ham harbiy holat joriy qildi va bir-birini tinch aholiga qarshi hujumlarda aybladi. Qurbonlar ham harbiy xizmatchilar, ham oddiy odamlar bo‘ldi. 9-oktabrda Moskvada ziddiyatli tomonlarning vakillari bilan muzokaralar olib borildi, natijada jangovar harakatlarni to‘xtatish to‘g‘risida qaror qabul qilindi. O‘t ochishni to‘xtatish 10-oktabr kuni ertalab kuchga kirdi.
10-noyabrga o‘tar kechasi Armaniston bosh vaziri Nikol Pashinyan Ozarbayjon va Rossiya prezidentlari Ilhom Aliyev va Vladimir Putin bilan Tog‘li Qorabog‘da o‘t ochishni va jangovar harakatlarni to‘xtatish to‘g‘risida kelishuv imzoladi. Hujjatga ko‘ra, Boku va Yerevan egallab turgan pozitsiyalarida to‘xtab, Tog‘li Qorabog‘ hududining bir qismi, shu jumladan, strategik jihatdan muhim Shusha shahri Ozarbayjonga o‘tadi. Shartlarda aytilishicha, Armaniston 20-noyabrgacha Agdam va Kalbajar tumanlarini, 1-dekabrga qadar Lachinni Ozarbayjonga qaytarishi kerak edi. Shuningdek, kelishuv mintaqaga Rossiya tinchlikparvar kuchlarini kiritishni nazarda tutadi.
Izoh (0)