Armaniston bosh vaziri Pashinyanni o‘ldirishga tayyorlanishda gumonlanib qo‘lga olingan MXX sobiq rahbari sud zalidan ozod qilindi

Yerevanda sud Armaniston Milliy xavfsizlik xizmati sobiq direktori Artur Vanetsyanni hibsga olishdan bosh tortdi, u avvalroq bosh vazir Nikol Pashinyanni o‘ldirishga tayyorgarlik ko‘rish ishi bo‘yicha qo‘lga olingan edi. Bu haqda Meduza xabar bermoqda.

Sputnik aniqlik kiritishicha, sud Vanetsyanni hibsga olish haqidagi qarorni g‘ayriqonuniy deb topdi.

Sud qaroridan keyin Vanetsyan o‘zining ta’qib qilinishini siyosiy maqsadga ega deb hisoblashini aytdi.

“Amaldagi hukumat yana bir marta noqonuniy va qalbaki ishlar bilan mening siyosiy faoliyatimga to‘sqinlik qilishga urindi. Lekin xudoga shukur, adolat bor va u bu bosqichda g‘alaba qozondi”, — dedi Vanetsyan sud binosini tark etarkan. U sudga yana qaytib kelishini aytdi.

Vanetsyan, shuningdek, noqonuniy qurol aylanishiga aloqadorlikda va hukumatni tortib olishga tayyorlanishda ham gumon qilingandi. “Hukumatning mamlakat ichida siyosiy muxolifatchilarni bostirish maqsadidagi ‘ijodkorlik’kagina qodir bo‘lgan fikr-xayol parvozi shu darajaga yetdiki, endi ular hukumatni o‘zlashtirish va Nikol Pashinyanni o‘ldirishga tayyorgarlik ko‘rish ayblovini o‘ylab topdi”, — deb yozgandi uning advokati Lusine Saakyan.

Artur Vanetsyan va boshqa muxolifatchilar Armanistondagi norozilik aksiyalaridan keyin qo‘lga olindi. Ozarbayjon va Rossiya bilan tinchlik shartnomasi shartlaridan norozi bo‘lganlar Pashinyanning iste’fosini talab qilmoqda.

Avvalroq Armaniston Maxsus tergov xizmati Yerevanda ommaviy yig‘ilishlarni noqonuniy tashkil etish bo‘yicha jinoiy ish doirasida muxolifatning 10 nafar rahbari qo‘lga olinganini ma’lum qilgan edi.

Eslatib o‘tamiz, Yerevanda 10-noyabrdan buyon ommaviy noroziliklar davom etmoqda. Bunga Armaniston bosh vaziri Nikol Pashinyan Tog‘li Qorabog‘dagi urushni tugatish to‘g‘risidagi bitimni imzolagani sabab bo‘lgan. Bitimga ko‘ra Tog‘li Qorabog‘ hududining qariyb yarmi Ozarbayjon nazoratiga o‘tadi. Namoyishchilar kelishuvni “sotqinlik” deb atagan va uni imzolagan Pashinyan iste’fosini talab qilmoqda.

Pashinyanning o‘zi ushbu bitimni imzolashdan boshqa chorasi qolmaganini aytgan. Uning fikricha, Armaniston jangovar harakatlarni davom ettirganida, nafaqat Tog‘li Qorabog‘ poytaxti Stepanakertni, balki butun Tog‘li Qorabog‘ni qo‘ldan chiqargan, minglab harbiy xizmatchilar qurshovda qolib ketgan bo‘lardi.

“Vatan” muxolifat partiyasi yetakchisi Artur Vanesyan Armaniston Tog‘li Qorabog‘da o‘t ochishni to‘xtatish to‘g‘risidagi bitim shartlarini mamlakatda hukumat almashganidan so‘ng o‘zgartirishi mumkinligini ma’lum qilgan.