Andijon viloyatida suv oqizib ketgan ikki shaxs qutqarib olindi, deya xabar bermoqda Milliy Gvardiya Qo‘riqlash xizmati.
Ma’lum qilinishicha, 2020-yilning 13-noyabr kuni soat 09:30 larda Andijon tumani Qoradaryo ustidan o‘tuvchi ko‘prikdan o‘zini suvga tashlagan ayolni ushbu hududga yaqin bo‘lgan “Med Siti” davolash maskani shifokori ko‘rib qolib, uni qutqarish uchun o‘zini suvga tashlaydi.
Suvning tezlik oqimi kuchli bo‘lganligi sababli ayol bilan shifokorni ham oqizib ketadi. Shundan so‘ng Norin Qoradaryo suv inshooti boshqarmasiga qarashli Kuyganyor suv to‘g‘onida xizmat olib borayotgan Milliy Gvardiya Andijon viloyati Qo‘riqlash boshqarmasi 1-alohida otryadi xodimlari daryoda oqib kelayotgan ikki nafar shaxsni ko‘rib qolishadi.
Xodimlar tomonidan ko‘rilgan chora natijasida ikki shaxs ham suvdan qutqarilib, hayoti saqlab qolinadi.
Holat yuzasidan tegishli organlarga xabar berilib, ayol shifoxonaga yotqizilgan. Hozirda Andijon tumani prokuraturasi tomonidan surishtiruv ishlari olib borilmoqda.
Avvalroq Toshkent viloyatida tuproq bosib qolgan qurilish ishchisi, Toshkentda kanalizatsiya uchun qazilgan 5 metrli chuqurga yiqilgan fuqaro hamda Chirchiqda eri bilan janjallashib, o‘zini Bo‘zsuv kanaliga tashlagan ayol qutqarib qolingani haqida xabar qilingandi.
Izoh (0)