Андижон вилоятида сув оқизиб кетган икки шахс қутқариб олинди, дея хабар бермоқда Миллий Гвардия Қўриқлаш хизмати.
Маълум қилинишича, 2020 йилнинг 13 ноябрь куни соат 09:30 ларда Андижон тумани Қорадарё устидан ўтувчи кўприкдан ўзини сувга ташлаган аёлни ушбу ҳудудга яқин бўлган «Мед Сити» даволаш маскани шифокори кўриб қолиб, уни қутқариш учун ўзини сувга ташлайди.
Сувнинг тезлик оқими кучли бўлганлиги сабабли аёл билан шифокорни ҳам оқизиб кетади. Шундан сўнг Норин Қорадарё сув иншооти бошқармасига қарашли Куйганёр сув тўғонида хизмат олиб бораётган Миллий Гвардия Андижон вилояти Қўриқлаш бошқармаси 1-алоҳида отряди ходимлари дарёда оқиб келаётган икки нафар шахсни кўриб қолишади.
Ходимлар томонидан кўрилган чора натижасида икки шахс ҳам сувдан қутқарилиб, ҳаёти сақлаб қолинади.
Ҳолат юзасидан тегишли органларга хабар берилиб, аёл шифохонага ётқизилган. Ҳозирда Андижон тумани прокуратураси томонидан суриштирув ишлари олиб борилмоқда.
Аввалроқ Тошкент вилоятида тупроқ босиб қолган қурилиш ишчиси, Тошкентда канализация учун қазилган 5 метрли чуқурга йиқилган фуқаро ҳамда Чирчиқда эри билан жанжаллашиб, ўзини Бўзсув каналига ташлаган аёл қутқариб қолингани ҳақида хабар қилинганди.
Изоҳ (0)