Hech qachon SARS-CoV-2 virusi bilan kontaktda bo‘lmagan odamlarning qonida ham koronaviruslarga turdosh bo‘lgan va unga qarshi tura oluvchi antitanalar mavjudligi aniqlandi.
Ma’lum sondagi odamlar SARS-CoV-2 virusi bilan kontaktda bo‘lmagan holatda ham ushbu virusga qarshi tura oluvchi orttirilgan immunitetga ega bo‘lishi mumkin. Ularning antitanalari koronaviruslarga yaqin turdosh bo‘lgan va oddiy mavsumiy shamollash kasalliklarini keltirib chiqaruvchi boshqa viruslar ta’sirida shakllangan bo‘lib, SARS-CoV-2 virusini ham zararsizlantira oladi va shu orqali xastalikning kechishini yengillashtiradi. Bu haqida Science jurnalida e’lon qilingan yangi maqolada ta’kidlanmoqda.
Britaniyalik tibbiyot mutaxassislaridan iborat katta ilmiy jamoa 16 yoshgacha bo‘lgan bolalar va kattalarning pandemiyaga qadar bo‘lgan davrda va pandemiyaning dastlabki oylarida olingan va COVID-19 ga nisbatan manfiy natija bergan qon namunalarini tahlil qilib chiqdi. Olimlar ushbu qon namunasida mavjud bo‘lgan antitanalarni koronavirus bilan kasallanib tuzalgan bemorlar qonidan aniqlangan antitanalar bilan taqqosladi.
Kutilganidek, COVID-19 bilan kasallanib tuzalgan kishilarning qonida virusning S-oqsiliga hujum qiluvchi turli immunoglobulinlar aniqlandi. Biroq ular bilan kontaktda bo‘lmagan bir necha odamlarda ham ushbu oqsilni bog‘lovchi G (lgG) immunoglobulini mavjudligi ma’lum bo‘ldi. 302 nafar katta yoshli odamlardan 16 nafarida (5 foiz) hamda 48 nafar yosh bolalarning 21 nafarida (44 foiz) shunday holat aniqlandi.
lgG immunoglobulin SARS-CoV-2 virusiga o‘xshash virusli infeksiyalar bilan nisbatan yaqin orada kasallanib tuzalgan odamlarda shakllangan orttirilgan immunitetning bir qismi hisoblanadi. Bunday kross-reaktiv antitanalar koronavirusning S-oqsilini bog‘lash borasida aynan uning uchun mo‘ljallangan maxsus antitana kabi samarador bo‘lmasligi mumkin, biroq u tanadagi kasallikning kechishiga va epidemiyaning tarqalish ko‘lamiga jiddiy ta’sir qila oladi.
Ehtimol, COVID-19 ning bolalarda nisbatan yengil kechayotganini shu bilan izohlash mumkindir. Boshqa tarafdan esa ushbu antitanalarning jarayonga aloqadorligi to‘liq tasdiqlangani yo‘q va aksincha, ma’lum hollarda tanada shu singarikross-reaktiv antitanalarning mavjudligi kasallikning kechishini qiyinlashtirib qo‘yishi mumkin. Xususan, immunoglobulinlarning o‘zi yangi turdagi koronavirusga qarshi yetarlicha samaradorlikda kurashmasa ham, aynan shu virusga qarshi kurashadigan immunoglobulinlarning ishlab chiqarilishini qiyinlashtirib qo‘yadi.
Izoh (0)