Ҳеч қачон SARS-CoV-2 вируси билан контактда бўлмаган одамларнинг қонида ҳам коронавирусларга турдош бўлган ва унга қарши тура олувчи антитаналар мавжудлиги аниқланди.
Маълум сондаги одамлар SARS-CoV-2 вируси билан контактда бўлмаган ҳолатда ҳам ушбу вирусга қарши тура олувчи орттирилган иммунитетга эга бўлиши мумкин. Уларнинг антитаналари коронавирусларга яқин турдош бўлган ва оддий мавсумий шамоллаш касалликларини келтириб чиқарувчи бошқа вируслар таъсирида шаклланган бўлиб, SARS-CoV-2 вирусини ҳам зарарсизлантира олади ва шу орқали хасталикнинг кечишини енгиллаштиради. Бу ҳақида Science журналида эълон қилинган янги мақолада таъкидланмоқда.
Британиялик тиббиёт мутахассисларидан иборат катта илмий жамоа 16 ёшгача бўлган болалар ва катталарнинг пандемияга қадар бўлган даврда ва пандемиянинг дастлабки ойларида олинган ва COVID-19 га нисбатан манфий натижа берган қон намуналарини таҳлил қилиб чиқди. Олимлар ушбу қон намунасида мавжуд бўлган антитаналарни коронавирус билан касалланиб тузалган беморлар қонидан аниқланган антитаналар билан таққослади.
Кутилганидек, COVID-19 билан касалланиб тузалган кишиларнинг қонида вируснинг S-оқсилига ҳужум қилувчи турли иммуноглобулинлар аниқланди. Бироқ улар билан контактда бўлмаган бир неча одамларда ҳам ушбу оқсилни боғловчи G (lgG) иммуноглобулини мавжудлиги маълум бўлди. 302 нафар катта ёшли одамлардан 16 нафарида (5 фоиз) ҳамда 48 нафар ёш болаларнинг 21 нафарида (44 фоиз) шундай ҳолат аниқланди.
lgG иммуноглобулин SARS-CoV-2 вирусига ўхшаш вирусли инфекциялар билан нисбатан яқин орада касалланиб тузалган одамларда шаклланган орттирилган иммунитетнинг бир қисми ҳисобланади. Бундай кросс-реактив антитаналар коронавируснинг S-оқсилини боғлаш борасида айнан унинг учун мўлжалланган махсус антитана каби самарадор бўлмаслиги мумкин, бироқ у танадаги касалликнинг кечишига ва эпидемиянинг тарқалиш кўламига жиддий таъсир қила олади.
Эҳтимол, COVID-19 нинг болаларда нисбатан енгил кечаётганини шу билан изоҳлаш мумкиндир. Бошқа тарафдан эса ушбу антитаналарнинг жараёнга алоқадорлиги тўлиқ тасдиқлангани йўқ ва аксинча, маълум ҳолларда танада шу сингарикросс-реактив антитаналарнинг мавжудлиги касалликнинг кечишини қийинлаштириб қўйиши мумкин. Хусусан, иммуноглобулинларнинг ўзи янги турдаги коронавирусга қарши етарлича самарадорликда курашмаса ҳам, айнан шу вирусга қарши курашадиган иммуноглобулинларнинг ишлаб чиқарилишини қийинлаштириб қўяди.
Изоҳ (0)