Shavkat Mirziyoyev 9-noyabr kuni “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonunni imzoladi. Spot’ning Davlat soliq qo‘mitasi matbuot xizmatiga tayanib xabar berishicha, hujjat bilan Soliq kodeksiga bir qator o‘zgartirishlar kiritildi.
Birinchidan, foizlar ko‘rinishidagi daromadlarni soliqqa tortishning o‘ziga xos xususiyatlari to‘g‘risidagi modda to‘ldirildi:
O‘zbekiston rezidenti bo‘lgan yuridik shaxs tomonidan notijorat va budjet tashkilotlariga mablag‘larni depozitga joylashtirishdan to‘lanadigan foizlarga to‘lov manbayida soliq solinadi va bunday daromadlar oluvchilarning soliq bazasini aniqlashda chegirib tashlanadi.
Ikkinchidan, jismoniy shaxslarning jami daromadlari tarkibiga kiritilmaydigan daromadlari to‘g‘risidagi moddaga o‘zgartirish kiritildi:
davlat pensiyalari, qonun hujjatlarida belgilangan nafaqalar, jismoniy shaxslarning jami daromadlari tarkibiga kiritilmaydi, bundan vaqtincha mehnatga layoqatsizlik nafaqasi (oilaning betob a’zosini parvarish qilish bo‘yicha nafaqa) mustasno.
Uchinchidan, jismoniy shaxslarning jami daromadlari tarkibiga kiritilmaydigan daromadlari to‘g‘risidagi moddaga yangi band kiritildi:
fuqarolarning o‘zini o‘zi boshqarish organlari, kasaba uyushmalari, xayriya, ekologiya jamg‘armalari va O‘zbekiston Respublikasi Prezidentining qarorlari bilan tashkil etilgan boshqa jamg‘armalar tomonidan ko‘rsatilgan yordam:
- ustavda nazarda tutilgan faoliyat doirasida bajarilgan ishlar va ko‘rsatilgan xizmatlar;
- davolash va tibbiy xizmatlar qiymati, nogironlarni profilaktika va reabilitatsiya qilish uchun texnik asbob-uskunalar olish;
- jismoniy shaxsning manfaatlarini ko‘zlab, tovarlar va xizmatlarni yetkazib beruvchidan olish;
- xayriya maqsadida boshqa shakllarda qo‘llab-quvvatlash (bundan pul shaklida qo‘llab-quvvatlash mustasno) soliq to‘lovchi jismoniy shaxslarning daromadlari sifatida qaralmaydi.
fuqarolarning o‘zini o‘zi boshqarish organlari, kasaba uyushmalari, xayriya va ekologiya jamg‘armalari tomonidan soliq to‘lovchilarga beriladigan nafaqalar, shuningdek, pul mablag‘lari tarzidagi yordamning boshqa turlari, soliq davri mobaynida 15 million so‘mdan oshmagan qismi jismoniy shaxslardan olinadigan daromad solig‘idan ozod qilinadi.
Ushbu qoidalar 2020-yil 1-apreldan e’tiboran yuzaga kelgan munosabatlarga ham tatbiq etiladi.
Izoh (0)