Ўзбекистон Солиқ кодексига бир қатор ўзгартиришлар киритилди

Шавкат Мирзиёев 9 ноябрь куни «Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонунни имзолади. Spot’нинг Давлат солиқ қўмитаси матбуот хизматига таяниб хабар беришича, ҳужжат билан Солиқ кодексига бир қатор ўзгартиришлар киритилди.

Биринчидан, фоизлар кўринишидаги даромадларни солиққа тортишнинг ўзига хос хусусиятлари тўғрисидаги модда тўлдирилди:

Ўзбекистон резиденти бўлган юридик шахс томонидан нотижорат ва бюджет ташкилотларига маблағларни депозитга жойлаштиришдан тўланадиган фоизларга тўлов манбайида солиқ солинади ва бундай даромадлар олувчиларнинг солиқ базасини аниқлашда чегириб ташланади.

Иккинчидан, жисмоний шахсларнинг жами даромадлари таркибига киритилмайдиган даромадлари тўғрисидаги моддага ўзгартириш киритилди:

давлат пенсиялари, қонун ҳужжатларида белгиланган нафақалар, жисмоний шахсларнинг жами даромадлари таркибига киритилмайди, бундан вақтинча меҳнатга лаёқатсизлик нафақаси (оиланинг бетоб аъзосини парвариш қилиш бўйича нафақа) мустасно.

Учинчидан, жисмоний шахсларнинг жами даромадлари таркибига киритилмайдиган даромадлари тўғрисидаги моддага янги банд киритилди:

фуқароларнинг ўзини ўзи бошқариш органлари, касаба уюшмалари, хайрия, экология жамғармалари ва Ўзбекистон Республикаси Президентининг қарорлари билан ташкил этилган бошқа жамғармалар томонидан кўрсатилган ёрдам:

• уставда назарда тутилган фаолият доирасида бажарилган ишлар ва кўрсатилган хизматлар;
• даволаш ва тиббий хизматлар қиймати, ногиронларни профилактика ва реабилитация қилиш учун техник асбоб-ускуналар олиш;
• жисмоний шахснинг манфаатларини кўзлаб, товарлар ва хизматларни етказиб берувчидан олиш;
• хайрия мақсадида бошқа шаклларда қўллаб-қувватлаш (бундан пул шаклида қўллаб-қувватлаш мустасно) солиқ тўловчи жисмоний шахсларнинг даромадлари сифатида қаралмайди.

фуқароларнинг ўзини ўзи бошқариш органлари, касаба уюшмалари, хайрия ва экология жамғармалари томонидан солиқ тўловчиларга бериладиган нафақалар, шунингдек, пул маблағлари тарзидаги ёрдамнинг бошқа турлари, солиқ даври мобайнида 15 миллион сўмдан ошмаган қисми жисмоний шахслардан олинадиган даромад солиғидан озод қилинади.

Ушбу қоидалар 2020 йил 1 апрелдан эътиборан юзага келган муносабатларга ҳам татбиқ этилади.