Rossiyada 6-noyabr tongiga ko‘ra, koronavirusga chalinish bilan bog‘liq 20 498 ta holat qayd etildi, deb xabar bermoqda Meduza koronavirusga qarshi kurashish shtabiga tayanib.
Kunlik kasallanishlar soni ortishi bo‘yicha rekord (20 498 kishi) 6-noyabr kuni qayd etilgandi.
Eng ko‘p kasallanish holatlari Moskva (sutka davomida 5751 ta) va Sankt-Peterburgda (bir sutka ichida 1331 ta) kuzatilgan. Mamlakatda koronavirusga chalinganlarning umumiy soni 1 774 334 kishiga yetdi.
So‘nggi bir kecha-kunduzda infeksiyadan 286 kishi, umumiy hisobda esa 30 537 kishi vafot etgan. Sog‘ayganlar soni 1 324 419 nafarni tashkil etmoqda, shulardan 11 492 nafari so‘nggi sutkada tuzalib chiqqan.
Rossiyada koronavirusni aniqlash bo‘yicha so‘nggi sutkada 590 mingta, umumiy hisobda esa 64,6 millionta test o‘tkazilgan.
“Rospotrebnadzor” rahbari Anna Popova imzolagan qaror bilan 28-oktabrdan Rossiya fuqarolariga odamlar ommaviy to‘planadigan joylarda, transportda, avtomobil turargohlarida va liftlarda himoya niqoblarini taqish majburiy etib belgilandi. Transportda, taksilarda, do‘konlarda, restoranlarda va teatrlarda dezinfeksiya rejimi kuchaytiriladi.
Rossiyalik virusolog, professor Viktor Zuyevning aytishicha, mamlakatda epidemiologik vaziyat 2021-yil yozida barqarorlashadi. “Vektor” virusologiya va biotexnologiya davlat ilmiy markazi bosh direktori o‘rinbosari Aleksandr Agafonovning fikricha, koronavirus infeksiyasi ustidan nazoratni vaksina yordamida o‘rnatish mumkin.
Izoh (0)