Россияда 6 ноябрь тонгига кўра, коронавирусга чалиниш билан боғлиқ 20 498 та ҳолат қайд этилди, деб хабар бермоқда Meduza коронавирусга қарши курашиш штабига таяниб.
Кунлик касалланишлар сони ортиши бўйича рекорд (20 498 киши) 6 ноябрь куни қайд этилганди.
Энг кўп касалланиш ҳолатлари Москва (сутка давомида 5751 та) ва Санкт-Петербургда (бир сутка ичида 1331 та) кузатилган. Мамлакатда коронавирусга чалинганларнинг умумий сони 1 774 334 кишига етди.
Сўнгги бир кеча-кундузда инфекциядан 286 киши, умумий ҳисобда эса 30 537 киши вафот этган. Соғайганлар сони 1 324 419 нафарни ташкил этмоқда, шулардан 11 492 нафари сўнгги суткада тузалиб чиққан.
Россияда коронавирусни аниқлаш бўйича сўнгги суткада 590 мингта, умумий ҳисобда эса 64,6 миллионта тест ўтказилган.
«Роспотребнадзор» раҳбари Анна Попова имзолаган қарор билан 28 октябрдан Россия фуқароларига одамлар оммавий тўпланадиган жойларда, транспортда, автомобиль тураргоҳларида ва лифтларда ҳимоя ниқобларини тақиш мажбурий этиб белгиланди. Транспортда, таксиларда, дўконларда, ресторанларда ва театрларда дезинфекция режими кучайтирилади.
Россиялик вирусолог, профессор Виктор Зуевнинг айтишича, мамлакатда эпидемиологик вазият 2021 йил ёзида барқарорлашади. «Вектор» вирусология ва биотехнология давлат илмий маркази бош директори ўринбосари Александр Агафоновнинг фикрича, коронавирус инфекцияси устидан назоратни вакцина ёрдамида ўрнатиш мумкин.
Изоҳ (0)