Қашқадарё вилоятининг Деҳқонобод туманида уч нафар эгизак қизалоқ дунёга келди. Бу ҳақда хабар берган Деҳқонобод туман ҳокимлиги ахборот хизматига кўра, чақалоқлар 5 ноябрь куни туғилган.
Эгизакларнинг онаси Лола Боймуродованинг айтишича, оила беш нафар қиз ва бир нафар ўғил фарзандидан сўнг яна ўғил туғилишини кутган.
«Олти нафар фарзандимиз бор. Уларнинг беш нафари қиз ва бир нафари ўғил бўлгани учун яна ўғил фарзанд дунёга келтираман деб ният қилгандим. Шукурки, Яратган эгизак фарзандлар билан сийлади», — дейди эгизакларнинг онаси Лола Боймуродова.
Маълум қилинишича, эндиликда Лола Боймуродова ҳамда Абдувоҳид Алибоевлар хонадонида фарзандлар сони тўққиз нафарга етган.
«Деҳқонобод туманида эгизак фарзандларнинг туғилиши бундан 33 йил илгари — 1987 йил қайд этилган экан. Демакки, туманимиз учун тарихий воқеа бўлди», — дейди туман тиббиёт бирлашмаси бошлиғи Фармон Жалилов.
Деҳқонобод туман ҳокимлиги ахборот хизматининг қўшимча қилишича, эгизак қизалоқлар ва уларнинг онасига туман ҳокимлигининг эсдалик совғалари топширилган.
«Туман ҳокими ҳамда шифокорларга раҳмат. Эътибордан четда қолдирмай, қувончимга қувонч қўшишди. Ҳоким ўринбосари туманимиз ҳокимининг махсус совға-саломини келтириб, фарзандларим туғилган кунида қувончимга шерик бўлди. Насиб этса, шундай шукрона кунларга атаб қизларимнинг бирини Шукрона деб атамоқчиман», — дейди эгизакларнинг онаси.
Қайд этилишича, 1,8 кг, 1,6 кг ва 1 кг вазнда туғилган чақалоқларга Фотима, Зуҳра ва Шукрона исмларини бериш ният қилинган.
Эслатиб ўтамиз, аввалроқ Андижон вилоятининг Пахтаобод туманида, шунингдек Наманган ва Бекободда тўрт эгизак дунёга келган эди. Қарши шаҳар туғруқ комплексида эса чироқчилик она уч нафар эгизакни дунёга келтирганди.
Мавзуга доир:
Изоҳ (0)