Tailandda uch sutkaga yo‘qolgan mushuk “bo‘ynida qarz bilan” qaytib keldi

Tailandda yo‘qolib qolgan mushuk oradan uch kun o‘tib, bo‘yniga bir parcha qog‘oz ilingan holda qaytib keldi. Unda yozilishicha, mushukning endilikda qarzi bor, deb xabar beradi The Indian Express.

Mushukning egasi u yo‘qolib qolganidan juda tashvishga tushgan. Oradan uch kun o‘tgach esa mushuk qaytib kelgan. Uning bo‘yinbog‘iga esa bir parcha qog‘oz ilingan bo‘lib, unga “Mushugingiz kioskamdagi makrellardan (baliq) ko‘zini uzmagani uchun unga uch dona berdim”, deya yozilgan.

“Maktub” muallifi uning ostida “Mey xola” deb imzo chekkan va telefon raqamini qoldirgan.

Mushukning egasi uni suratga olib, “Uch kunga ketib, qarz bo‘lib qaytib keldi” degan izoh bilan Facebook’dagi sahifasiga joylashtirgan.

Ushbu post ijtimoiy tarmoq foydalanuvchilarining kayfiyatini ko‘targan. Ular mushuk yegan makrellar pulini to‘lashni taklif qilgan. Ayrimlar esa “Mey xola” telefon raqamini pul olish uchun emas, balki mushukka hech narsa qilmaganini ma’lum qilish maqsadida yozib qoldirganini taxmin qilmoqda.

Avvalroq Britaniyada sakkiz yil oldin yo‘qolgan mushuk yana oilasiga qaytib kelgani to‘g‘risida xabar berilgandi.