Таиландда уч суткага йўқолган мушук «бўйнида қарз билан» қайтиб келди

Таиландда йўқолиб қолган мушук орадан уч кун ўтиб, бўйнига бир парча қоғоз илинган ҳолда қайтиб келди. Унда ёзилишича, мушукнинг эндиликда қарзи бор, деб хабар беради The Indian Express.

Мушукнинг эгаси у йўқолиб қолганидан жуда ташвишга тушган. Орадан уч кун ўтгач эса мушук қайтиб келган. Унинг бўйинбоғига эса бир парча қоғоз илинган бўлиб, унга «Мушугингиз киоскамдаги макреллардан (балиқ) кўзини узмагани учун унга уч дона бердим», дея ёзилган.

«Мактуб» муаллифи унинг остида «Мей хола» деб имзо чеккан ва телефон рақамини қолдирган.

Мушукнинг эгаси уни суратга олиб, «Уч кунга кетиб, қарз бўлиб қайтиб келди» деган изоҳ билан Facebook’даги саҳифасига жойлаштирган.

Ушбу пост ижтимоий тармоқ фойдаланувчиларининг кайфиятини кўтарган. Улар мушук еган макреллар пулини тўлашни таклиф қилган. Айримлар эса «Мей хола» телефон рақамини пул олиш учун эмас, балки мушукка ҳеч нарса қилмаганини маълум қилиш мақсадида ёзиб қолдирганини тахмин қилмоқда.

Аввалроқ Британияда саккиз йил олдин йўқолган мушук яна оиласига қайтиб келгани тўғрисида хабар берилганди.