Rossiya aholisining COVID-19 testlariga sarflagan xarajatlari qoplab berilishi mumkin

Rossiya iste’molchilar ittifoqi va Xalqaro iste’molchilar jamiyatlari konfederatsiyasi xususiy klinikalarda koronavirusga qarshi pulli test topshirgan fuqarolarning xarajatlarini budjet mablag‘laridan qoplab berishni taklif qildi. Tegishli taklif Rossiya Xavfsizlik kengashining Yangi infeksiyalardan himoyaning milliy tizimini yaratish masalalari bo‘yicha idoralararo komissiyasi raisi Dmitriy Medvedevga va bosh sanitar shifokor Anna Popovaga 16 va 28-oktabr kunlari yo‘naltirilgan. Bu haqda “Izvestiya” gazetasi xatlarning nusxalariga tayanib xabar berdi.

Iste’molchilar ittifoqi raisi Pyotr Shelishch nashrga ma’lum qilishicha, ularga koronavirusga chalingan oilalarning a’zolari murojaat qilib, COVID-19’ga tahlillarni o‘z hisoblaridan xususiy klinikalarda topshirishga majbur bo‘layotgani, chunki poliklinikalarda navbatlar tufayli test topshirishni ikki-uch hafta kutishga to‘g‘ri kelishi haqida shikoyat qila boshlagan.

Rossiya iste’molchilar ittifoqi va Xalqaro iste’molchilar jamiyatlari konfederatsiyasi fuqarolarning pandemiyaga bog‘liq xarajatlarining bir qismini, masalan, COVID-19’ga tahlillar uchun chiqimlarni budjet tizimiga yuklashni taklif qildi. Ularni, Shelishchning fikricha, Majburiy tibbiy sug‘urta jamg‘armasi qoplashi mumkin.

1-noyabr holatiga ko‘ra, Rossiyada so‘nggi bir sutka ichida 18 665 kishida koronavirus bilan kasallanish holati qayd etildi. Bu mamlakatda kunlik kasallanishlar soni bo‘yicha yangi antirekorddir.

Rossiyada ushbu kasallik qayd etilganlarning umumiy soni 1 636 781 nafarga yetdi. Ushbu ko‘rsatkich bo‘yicha Rossiya dunyoda to‘rtinchi o‘rinda bormoqda.

Mamlakatda koronavirusni aniqlash bo‘yicha so‘nggi 24 soat davomida 587 mingta, umumiy hisobda esa 61 millionta test o‘tkazilgan.

“Rospotrebnadzor” epidemiologi Aleksandr Gorelovning fikricha, Rossiyada kasallanganlar sonining ortishi yana 2-3 hafta davom etadi. Gamaleya nomidagi Milliy epidemiologiya va mikrobiologiya ilmiy-tadqiqot markazi virusologi Viktor Zuyev esa mamlakatda epidemiologik vaziyat 2021-yil yozida barqarorlashadi, degan fikrda.

“Rospotrebnadzor” rahbari Anna Popova Rossiyada kasallanishning ortishini yilning sovuq mavsumi boshlangani bilan bog‘lagan. Shuningdek, bunga ta’sir qiluvchi omillar qatoriga fuqarolarning ta’tildan va ishga qaytganligini kiritgan.