Россия аҳолисининг COVID-19 тестларига сарфлаган харажатлари қоплаб берилиши мумкин

Россия истеъмолчилар иттифоқи ва Халқаро истеъмолчилар жамиятлари конфедерацияси хусусий клиникаларда коронавирусга қарши пулли тест топширган фуқароларнинг харажатларини бюджет маблағларидан қоплаб беришни таклиф қилди. Тегишли таклиф Россия Хавфсизлик кенгашининг Янги инфекциялардан ҳимоянинг миллий тизимини яратиш масалалари бўйича идоралараро комиссияси раиси Дмитрий Медведевга ва бош санитар шифокор Анна Поповага 16 ва 28 октябрь кунлари йўналтирилган. Бу ҳақда «Известия» газетаси хатларнинг нусхаларига таяниб хабар берди.

Истеъмолчилар иттифоқи раиси Пётр Шелишч нашрга маълум қилишича, уларга коронавирусга чалинган оилаларнинг аъзолари мурожаат қилиб, COVID-19’га таҳлилларни ўз ҳисобларидан хусусий клиникаларда топширишга мажбур бўлаётгани, чунки поликлиникаларда навбатлар туфайли тест топширишни икки-уч ҳафта кутишга тўғри келиши ҳақида шикоят қила бошлаган.

Россия истеъмолчилар иттифоқи ва Халқаро истеъмолчилар жамиятлари конфедерацияси фуқароларнинг пандемияга боғлиқ харажатларининг бир қисмини, масалан, COVID-19’га таҳлиллар учун чиқимларни бюджет тизимига юклашни таклиф қилди. Уларни, Шелишчнинг фикрича, Мажбурий тиббий суғурта жамғармаси қоплаши мумкин.

1 ноябрь ҳолатига кўра, Россияда сўнгги бир сутка ичида 18 665 кишида коронавирус билан касалланиш ҳолати қайд этилди. Бу мамлакатда кунлик касалланишлар сони бўйича янги антирекорддир.

Россияда ушбу касаллик қайд этилганларнинг умумий сони 1 636 781 нафарга етди. Ушбу кўрсаткич бўйича Россия дунёда тўртинчи ўринда бормоқда.

Мамлакатда коронавирусни аниқлаш бўйича сўнгги 24 соат давомида 587 мингта, умумий ҳисобда эса 61 миллионта тест ўтказилган.

«Роспотребнадзор» эпидемиологи Александр Гореловнинг фикрича, Россияда касалланганлар сонининг ортиши яна 2-3 ҳафта давом этади. Гамалея номидаги Миллий эпидемиология ва микробиология илмий-тадқиқот маркази вирусологи Виктор Зуев эса мамлакатда эпидемиологик вазият 2021 йил ёзида барқарорлашади, деган фикрда.

«Роспотребнадзор» раҳбари Анна Попова Россияда касалланишнинг ортишини йилнинг совуқ мавсуми бошлангани билан боғлаган. Шунингдек, бунга таъсир қилувчи омиллар қаторига фуқароларнинг таътилдан ва ишга қайтганлигини киритган.