“O‘zsanoatqurilishbank” ATB, tijorat banklari orasida birinchilardan bo‘lib, O‘zbekiston ipotekani qayta moliyalashtirish kompaniyasi (O‘zIQMK) bilan bosh qaytamoliyalash shartnomasini imzoladi. Bu bank mijozlariga nafaqat yangi uylarga, balki ikkilamchi bozordagi ko‘chmas mulklarga ham qulay shartlarda ipoteka kreditlarini rasmiylashtirish imkonini beradi.
2020-yil 1-avgust holatiga ko‘ra, O‘zbekiston banklari ipoteka kreditlari hajmi 25 trillion so‘mga yoki mamlakat YaIMining 4 foiziga tengdir. Lekin banklar va rivojlanayotgan ikkilamchi ipoteka bozorlari uchun uzoq muddatli resurslarning yetishmasligi O‘zbekistonda ipoteka bozori rivojlanishining asosiy muammolaridan biri hisoblanadi.
O‘zbekiston Respublikasi Prezidentining 2019-yil 13-maydagi “Ipoteka krediti bozorini rivojlantirish va kengaytirishga oid qo‘shimcha chora-tadbirlar to‘g‘risida”gi farmoni ipoteka kreditlarini taqdim etish mexanizmlarini takomillashtirish va aholining barcha qatlamlari uchun bozor tamoyillari asosida ipoteka kreditlaridan foydalanish imkoniyatlarini oshirishda muhim dasturilamal bo‘lib xizmat qilmoqda.
“O‘zsanoatqurilishbank” ATB O‘zbekiston ipotekani qayta moliyalashtirish kompaniyasi o‘rtasida imzolangan yangi kelishuv yurtdoshlarimizga ham birlamchi, ham ikkilamchi bozordagi uy-joylarni 20 yilgacha muddatga yillik 18 foiz stavkasi asosida ipoteka krediti rasmiylashtirish imkonini beradi.
“Davlatimiz rahbarining tashabbusi bilan mamlakatimiz aholisini har tomonlama qulay, arzon, sifatli uy-joylar bilan ta’minlash borasida keng qamrovli chora-tadbirlar amalga oshirilmoqda. Bunda moliya muassasalari tomonidan qulay shartlarda ipoteka kreditlari ko‘lamining ortib borayotgani yurtdoshlarimizning o‘zining kichik Vataniga ega bo‘lishlarida muhim omil bo‘lmoqda. Bugungi kelishuv esa bankimiz mijozlariga yanada qulay shartlardagi ipoteka kreditlaridan foydalanishlari uchun imkoniyat yaratadi. Ayni paytda biz qayta moliyalashtirish va qimmatli qog‘ozlar ta’minoti asosida ipoteka kreditlari resursini jalb qilgan birinchi bank ekanligimizdan mamnunmiz”, — dedi O‘zsanoatqurilishbank Boshqaruvi raisining birinchi o‘rinbosari Aziz Akbarjonov.
“Biz ipoteka kreditlari bozorida juda muhim pallada turibmiz. Ipoteka bozorlarini rivojlantirishga ixtisoslashgan nobank moliya instituti sifatida O‘zIQMK O‘zsanoatqurilishbankni uzoq muddatli resurslar bilan ta’minlaydi. Bank sohasida yuksak urni va maqsadlariga ega bo‘lgan ilgor moliya instituti bilan yakin xamkorligimizdan xursandmiz”, — dedi O‘zIQMK Bosh direktori Murodjon Farmanov.
O‘zsanoatqurilishbank O‘zbekistondagi yirik tijorat banklaridan biri sifatida bugungi kunda respublika bo‘ylab keng filiallar tarmog‘iga ega, 1 milliondan ortiq chakana mijozlariga xizmat ko‘rsatib kelmoqda.
O‘zbekiston ipotekani qayta moliyalashtirish kompaniyasi nobank moliyaviy tashkiloti sifatida Moliya Vazirligi tomonidan 2019-yil 14-noyabrda qulay shartlardagi uy-joy fondlari yaratish va tijorat shartlari asosida mahalliy ipoteka bozorini rivojlantirish maqsadida tashkil etilgan. Bugungi kunda 12 ta bank kompaniya aksionerlari hisoblanadi. Kompaniya resurslari banklarni va ipoteka krediti oluvchilarni qo‘llab-quvvatlashga qaratilgan bo‘lib, yakuniy qarz oluvchi uy-joylarni kredit hisobiga sotib olayotganda qulay va uzoq muddatli moliyalashtirish imkoniyatiga ega bo‘ladi.
Reklama huquqi asosida
Izoh (0)