Poytaxtimizda Tadbirkorlar va ishbilarmonlar harakati – O‘zbekiston Liberal-demokratik partiyasi Siyosiy Kengashi Ijroiya qo‘mitasi tomonidan o‘tkazilgan bu yilgi “Ishbilarmon ayol-2020” ko‘rik-tanlovining Respublika bosqichi oldingilaridan tubdan farq qildi. Sababi O‘zLiDeP tomonidan xotin-qizlarni oilaviy tadbirkorlikka, kichik biznes va xususiy tadbirkorlik, fermerlikka jalb etish hamda bandligiga ko‘maklashish orqali yosh oilalarni qo‘llab-quvvatlash, iqtidorlarini ro‘yobga chiqarish, tashabbuslarini qo‘llab-quvvatlash borasidagi ishlarga bu yilgi pandemiya sharoitida e’tibor yanada kuchaytirildi.
Xususan, joylarda, ayniqsa eng chekka hududlarda, xotin-qizlar bandligini ta’minlash, ayniqsa, ilgarigi “temir daftar”dan farqli o‘laroq “ayollar daftari”ning joriy etilishi orqali ishsiz, hunarsiz ayollarni o‘qitishga, ishga joylashtirishga katta e’tibor qaratilmoqda. Bu borada “Har bir oila tadbirkor”, “Obod qishloq” va “Obod mahalla” dasturlarida belgilangan vazifalar ijrosini ta’minlashga yo‘naltirilgan maqsadli partiyaviy loyihalar amalga oshirilmoqda.
Barcha tadbirlar partiya “Ayollar qanoti” faollari, deputatlar, tajribali tadbirkorlar ishtirokida O‘zbekiston fermer, dehqon xo‘jaliklari va tomorqa yer egalari kengashi hamda bir qator tashkilotlar bilan hamkorlikda o‘tkazilmoqda. Ushbu “Ishbilarmon ayol” ko‘rik-tanlovi ana shunday partiyaviy loyihalar sirasiga kiradi.
Tanlov ishtirokchilari davlatimiz tomonidan so‘nggi uch-to‘rt yilda erkin va farovon jamiyat qurish, ayollarni ijtimoiy-iqtisodiy faolligini oshirish, ularning davlat va jamiyat hayotidagi o‘rni va mavqeini oshirish, oila institutini mustahkamlash kabi yo‘nalishlarda avval misli ko‘rilmagan tizimli ishlar hayotga tatbiq etilayotganini ta’kidladilar. Ayniqsa, Eng asosiysi — bu kabi e’tibor natijasi o‘laroq, mamlakat iqtisodiyotining tayanch ustunlaridan biri bo‘lgan kichik biznes va xususiy tadbirkorlikni rivojlantirishda ham mas’uliyatni o‘z zimmasiga olishga tayyor xotin-qizlarimiz yetishib chiqmoqda.
O‘zLiDeP ana shunday fidoyi xotin-qizlarnining yaratuvchanligi, bunyodkorligi, mehnatlarini ulug‘lash, jamoat ishlaridagi o‘rni va mavqeini yuksaltirishni o‘zining asosiy vazifalaridan biri deb biladi. Ushbu maqsad va vazifalardan kelib chiqib tashkil etilgan ko‘rik-tanlovdan ko‘zlangan asosiy maqsad ham mamlakatimiz taraqqiyoti va xalq farovonligi yo‘lida faol ishtirok etayotgan tadbirkor va fermer xotin-qizlarni qo‘llab-quvvatlash, hududlarda xotin-qizlar o‘rtasida oilaviy tadbirkorlikni jadal rivojlanishini rag‘batlantirish, xotin-qizlar tadbirkorligining ilg‘or tajribalarni ommalashtirish, tadbirkorlikka oid kasbiy mahorati va bilim darajasini oshirish uchun zaruriy shart-sharoit yaratish va eng asosiysi partiya Dasturi hamda 2017—2021-yillarda mamlakatimizni yanada rivojlantirishga qaratilgan Harakatlar strategiyasida belgilangan vazifalarni amalga oshirishdan iborat.
O‘zbekiston Savdo-sanoat palatasi, O‘zbekiston Kasaba uyushmalari Federatsiyasi hamda O‘zbekiston fermer, dehqon xo‘jaliklari va tomorqa yer egalari kengashi bilan hamkorlikda 2016-yildan buyon o‘tkazib kelinayotgan mazkur ko‘rik-tanlov natijasida tadbirkorlik subyektlari, korxona va tashkilotlarda 100 dan ortiq partiyaning quyi bo‘g‘ini tashkil etilib, 10 ming nafarga yaqin xotin-qizlar partiya safiga qabul qilindi.
To‘rt yildan buyon tashkil etib kelinayotgan ushbu tanlovda 8 ming nafar, bu yilgi tuman, shahar va viloyat bosqichlarida esa 2 ming nafardan ziyod tadbirkor, ishbilarmon va fermer ayollar o‘zlarining ishlab chiqargan mahsulotlari bilan ishtirok etishdi. Viloyat bosqichida faol ishtirok etib g‘oliblikni qo‘lga kiritgan 14 nafar tadbirkor va fermer ayollar Respublika bosqichigacha yetib keldi.
Dastlab tadbirkor va fermer ayollar tomonidan ishlab chiqarilgan mahsulotlar ko‘rgazmasi bo‘lib o‘tdi. Unda tadbirkor, ishbilarmon, hunarmand, fermer xotin-qizlarning mahsulotlari, ayniqsa, milliy yo‘nalishdagi liboslar namoyishi ko‘rik tanlov ishtirokchilarida milliy g‘urur, Vatanga muhabbat, Mustaqillikka bo‘lgan shukronalik hissini uyg‘otdi. Hamkor tashkilotlar va Oliy Majlis Qonunchilik palatasidagi partiya fraksiyasi a’zolaridan iborat bo‘lgan hakamlar hay’ati ishtirokchilarning ishlari bilan yaqindan tanishib, adolatli baholab borishdi.
Shuningdek, ishtirokchilarning loyiha nizomiga muvofiq, xotin-qizlar uchun qo‘shimcha yangi ish o‘rni yaratganligi, “Ayollar daftari”ga kiritilgan xotin-qizlarni kasb bo‘yicha o‘qitgan, bandligini ta’minlagan va hayotda o‘z o‘rnini topib ketishida ko‘maklashganligi, faoliyat turidan kelib chiqib eksportga yo‘naltirilgan yoki import o‘rnini bosuvchi mahsulot ishlab chiqarish, aholiga ko‘rsatayotgan xizmatining sifati hamda faoliyatida hayotga tatbiq etib kelayotgan yangi innovatsion g‘oyalari ham baholashda alohida e’tiborga olindi.
Ishbilarmon ayollarning chinakam bayramiga aylangan mazkur tadbir davomida ayolni, Vatanni, istiqlolni madh etuvchi kuy va qo‘shiqlar sadosi ostida tantanali taqdirlash marosimi bo‘lib o‘tdi.
Unda hakamlar tomonidan ishbilarmon ayol maqomiga munosib ko‘rilgan ishtirokchilar nomi e’lon qilinib, “Zamonaviy tashabbuskor ayol”, “Yilning muruvvatli ishbilarmon ayoli”, “Qishloqni ijtimoiy rivojlantirishda faollik ko‘rsatgan fermer ayol”, “Investitsiyalarni jalb qilishda tashabbus ko‘rsatgan ishbilarmon ayol”, “Eng yosh, faol ayol tadbirkor” kabi nominatsiyalar bo‘yicha ham g‘oliblar aniqlandi. Ishbilarmon ayollarga partiya va hamkor tashkilotlarning diplom va qimmatbaho esdalik sovg‘alari taqdim etildi.
O‘zLiDeP Matbuot xizmati
Sheriklik huquqi asosida
Izoh (0)