Toshkent vaqti bilan 1-noyabr tongida UFC Fight Night 181 musobaqasi bo‘lib o‘tdi.
Musobaqaning asosiy jangi o‘rta vazn toifasida UFC sobiq chempioni Anderson Silva (34-11) va Yurayya Holl (17-9) o‘rtasida kechdi. To‘rtinchi raundda Holl texnik nokaut evaziga raqibini taslim etdi. Bu Anderson uchun UFC’dagi so‘nggi jang edi.
Shuningdek, asosiy kardda Mahmud Murodov bilan to‘qnash kelishi ko‘zda tutilgan Kevin Holland ham jang qildi. Holland Charli Ontiverosni 1-raunddayoq taslim etdi. Eslatib o‘tamiz, Murodovda koronavirus aniqlangani bois mazkur jang bekor bo‘lgandi.
Ta’kidlash joiz, musobaqa doirasidagi 11 jangning 7 tasi muddatidan avval yakunlandi.
Barcha janglar videosini bu yerda tomosha qilish mumkin — VIDEO.
Asosiy kard natijalari bilan tanishing:
- Yurayya Holl (17-9) 4-raunddagi texnik nokaut evaziga Anderson Silvani (34-11) yengdi;
- Brays Mitchell (14-1) ochkolar hisobda Andre Filidan (21-8) ustun keldi;
- Greg Hardi (7-2) 2-raundda texnik nokaut evaziga Moris Grinni (9-6) mag‘lubiyatga uchratdi;
- Kevin Holland (20-5) 1-raundda og‘ritish usulini qo‘llab Charli Ontiverosni (11-7) taslim etdi;
- Tiagu Moyzes (14-4) ochkolar hisobida Bobbi Grindan (27-11-1) ustun keldi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)