Toshkentdagi tadbirkorlar gaz ta’minoti organi xodimlaridan 1-noyabrdan boshlab gaz uzatilishi o‘chirib qo‘yilishi to‘g‘risida ogohlantirish olmoqda. Bu haqda poytaxtdagi bir nechta restoranlar asoschisi (Belle Maman, “Svidalnaya” va hokazo) Artur Rudomyotkin o‘zining Facebook’dagi sahifasi orqali ma’lum qilgan. U energetika vaziri Alisher Sultonovning 26-oktabrdagi 143-sonli buyrug‘i surati bilan bo‘lishgan.
Unda yozilishicha, 2020—2021-yillarda iqtisodiyotni, ijtimoiy soha obyektlari va uy-joy fondini doimiy ravishda gaz bilan ta’minlash maqsadida ijtimoiy ahamiyatga ega bo‘lmagan hududlardagi (g‘isht, ohak, gips ishlab chiqaruvchilar va hokazo) yirik korxonalarga 1-noyabrdan tabiiy gaz yetkazib berilishi to‘xtatiladi.
Bundan tashqari, 1-noyabrdan boshlab bir kun ichida tabiiy gaz ta’minotidan to‘liq uzilib, muqobil yoqilg‘i manbalariga o‘tkaziladigan chakana iste’molchilar (qolipli non va novvoychilik bilan shug‘ullanadiganlar bundan mustasno) ro‘yxatini tuzish topshirilgan.
“Aftidan, bu tadbirkorlar uchun shunday og‘ir kunda biznesni qutqarishning yana bir chorasi bo‘lsa kerak. Bu nimani anglatadi? Uzoq davom etgan karantindan so‘ng umumiy ovqatlanish maskanlari sektori hozirning o‘zida barcha nuqtalarini elektr tokiga moslashtirishni mablag‘larni qayerdan olishni o‘ylamasdan boshlashi lozimligini bildiradi”, — deya izoh qoldirgan Rudomyotkin.
Artur Rudomyotkinning yozishicha, yirik restoran va kafelarni birlashtiruvchi Restoratorlar gildiyasining barcha a’zolari ushbu buyruq umumiy ovqatlanish maskanlarni qo‘llab-quvvatlash to‘g‘risida yaqinda qabul qilingan choralarga qanchalik mos kelishini tushunmayapti.
Shuningdek, ro‘yxatda Toshkent shahri yuqori bosimli gaz quvurlariga ulangan jami 54 ta avtomobillarga gaz to‘ldirish kompressor shoxobchalari grafik asosida har kuni soat 19:00 dan 07:00 ga qadar tabiiy gaz ta’minotidan to‘xtatilishi belgilangan.
Gaz ishlab chiqarish va uning savdosi qisqardi
Spot’ning yozishicha, shu yilning yanvar—sentabr oylarida gaz kondensatini ishlab chiqarish 542,7 ming tonnaga qisqargan. Shu bilan birga, tabiiy va sun’iy gaz eksporti ham 77,4 foizga qisqargan.
Oktabr oyida Rossiyaning “Gazprom” kompaniyasi 2020-yildan buyon kamida iyun oxiriga qadar O‘zbekistondan tabiiy gaz sotib olmagani ma’lum bo‘lgandi. Avvalroq boshqa bir kompaniya — “Lukoyl” O‘zbekistonda gaz qazib olishni qisqartirgandi.
Ikkala holatga ham Xitoy tomonidan talabning kam bo‘layotgani sabab bo‘lgan. Shu sababli “Lukoyl” 5 milliard metr kub gazni O‘zbekistonning ichki bozoriga yo‘naltirgan.
Izoh (0)