Energetika vazirligi Toshkent va boshqa viloyatlarda avtomobillarga gaz quyish kompressor shoxobchalariga (AGQSh) gaz yetkazib berish jadvaliga vaqtincha cheklovlar kiritishni rejalashtirmoqda. Bu haqda “Gazeta.uz” xabar bergan.
Foto: “Daryo”
Avvalroq 1-noyabrdan boshlab Toshkentdagi 54 ta yoqilg‘i quyish shoxobchalarida yangi ish tartibini joriy etishni rejalashtirilayotgani va har uch kunda navbatma-navbat (hammasida bir vaqtda emas), 19:00 dan 7:00 gacha gaz yetkazib berish to‘xtatib turilishi xabar qilingan. Ushbu chora aholi va ijtimoiy soha obyektlarini gaz bilan uzluksiz ta’minlashga qaratilgani, odam ko‘p bo‘lgan soatlarda yoqilg‘i quyish shoxobchalarida gaz iste’mol qilishning yuqori bo‘lishi tufayli bosim kamayishi qayd etilgandi.
Energetika vazirligining ma’lum qilishicha, yaqin kunlarda butun mamlakat uchun yangi jadval ishlab chiqilib, ommaga taqdim etiladi.
27-oktabrdan boshlab Andijon viloyatidagi gaz quyish shoxobchalarida gaz yetkazib berish vaqti soat 6:00 dan 16:00 gacha cheklangan.
Davlat statistika qo‘mitasi ma’lumotlariga ko‘ra, 2020-yilning ortda qolgan 9 oyi davomida gaz qazib chiqarish deyarli 20 foizga, ya’ni 44,8 milliarddan 36 milliard kubometrgacha kamaygan. Gaz kondensati 35 foizga, 1,5 million tonnadan 1 million tonnaga, ko‘mir — 3 foiz, ya’ni 2,7 milliondan 2,6 million tonnagacha kamaygan.
Yil boshidan buyon budjet sohalari ehtiyojlari uchun 405 ming 400 tonna ko‘mir yetkazib berilgan, bu o‘tgan yilga nisbatan 18,3 foizga ko‘p.
Avval “Hududgazta’minot” korxonasi vakili Abdusattor Qayumov yangi qurilayotgan ko‘p qavatli uylarda markazlashtirilgan isitish tizimi o‘rniga mahalliy isitish tizimi o‘rnatilayotgani va buning ko‘p gaz sarflanishiga olib kelib, gaz eksportining kamayishi ichki bozorga gaz yetkazib berishni ko‘paytirishga yordam bermayotgani haqida gapirgan.
