Qashqadaryo hokimi Zoir Mirzayev rahbarligidagi Xalq deputatlari viloyat kengashining navbatdagi sessiyasida xalq ta’limi bo‘limi mudirlariga xizmat avtomobillari ajratilmagani tanqid qilindi.
“Tuman xalq ta’limi bo‘limi mudiri hududidagi maktabga nimada boradi, poyezdga osilib boradimi?”, — deya savol berdi Zoir Mirzayev.
Sessiyada aniqlik kiritilishicha, viloyatda faqat Koson va Chiroqchi tumani xalq ta’limi bo‘limi mudirlariga xizmat avtomobillari berilgan.
“Mudirlarga xizmat avtomobillari berilgan edi-ku, hozir bu tartib bekor qilinganmi? Moliyachilarimiz nima deydi? Balki, bundan respublikaning ham xabari yo‘qdir. Qiziqib ko‘rish kerak. Nima bo‘lganda ham xalq ta’limi bo‘limi mudirlariga xizmat avtomobillari berilishi kerak”, — degan viloyat rahbari.
Sessiyada so‘z olgan Zoir Mirzayev tuman xalq ta’limi bo‘limi mudirlarining ta’lim-tarbiya bilan qiziqmasligini aytib, “Mudir bugun bu maktabga boradi parta, ikkinchisiga boradi ko‘mir, bunisiga boradi qurilish, bunisiga boradi ‘kotyol’...Xullas, o‘rtada ta’lim esdan chiqadi. Men aniq bilaman, tuman xalq ta’limi bo‘limi mudirlari ta’lim sifatini umuman muhokama qilmaydi. Faqatgina hududingni tozalab qo‘y, sariq o‘t bosib ketibdi, degan ish bilan shug‘ullanadi”, dedi.
Qashqadaryo hokimi sessiyada, shuningdek, xalq ta’limi bo‘limi mudirlari ham maktablarda dars o‘tib turishi lozimligi haqida gapirgan.
“Xalq ta’limi boshqarmasi va bo‘limi uslubchisi, maktab direktori va uning o‘rinbosarlari ham maktabda dars o‘tishi lozim. Ular maktabda dars o‘tib borsa, o‘qituvchi sifatida bilim-salohiyatini saqlab qoladi”, — dedi viloyat rahbari.
Izoh (0)