Қашқадарё ҳокими Зоир Мирзаев раҳбарлигидаги Халқ депутатлари вилоят кенгашининг навбатдаги сессиясида халқ таълими бўлими мудирларига хизмат автомобиллари ажратилмагани танқид қилинди.
«Туман халқ таълими бўлими мудири ҳудудидаги мактабга нимада боради, поездга осилиб борадими?», — дея савол берди Зоир Мирзаев.
Сессияда аниқлик киритилишича, вилоятда фақат Косон ва Чироқчи тумани халқ таълими бўлими мудирларига хизмат автомобиллари берилган.
«Мудирларга хизмат автомобиллари берилган эди-ку, ҳозир бу тартиб бекор қилинганми? Молиячиларимиз нима дейди? Балки, бундан республиканинг ҳам хабари йўқдир. Қизиқиб кўриш керак. Нима бўлганда ҳам халқ таълими бўлими мудирларига хизмат автомобиллари берилиши керак», — деган вилоят раҳбари.
Сессияда сўз олган Зоир Мирзаев туман халқ таълими бўлими мудирларининг таълим-тарбия билан қизиқмаслигини айтиб, «Мудир бугун бу мактабга боради парта, иккинчисига боради кўмир, бунисига боради қурилиш, бунисига боради ‘котёл’...Хуллас, ўртада таълим эсдан чиқади. Мен аниқ биламан, туман халқ таълими бўлими мудирлари таълим сифатини умуман муҳокама қилмайди. Фақатгина ҳудудингни тозалаб қўй, сариқ ўт босиб кетибди, деган иш билан шуғулланади», деди.
Қашқадарё ҳокими сессияда, шунингдек, халқ таълими бўлими мудирлари ҳам мактабларда дарс ўтиб туриши лозимлиги ҳақида гапирган.
«Халқ таълими бошқармаси ва бўлими услубчиси, мактаб директори ва унинг ўринбосарлари ҳам мактабда дарс ўтиши лозим. Улар мактабда дарс ўтиб борса, ўқитувчи сифатида билим-салоҳиятини сақлаб қолади», — деди вилоят раҳбари.
Изоҳ (0)