Qashqadaryo viloyati hokimi Zoir Mirzayev internetda shov-shuvlarga sabab bo‘lgan Chiroqchidagi maktab haqida gapirib, qo‘rqinchli sinfxonalarga o‘tin kiritib, jamoatchilikni aldashga uringan direktorni vazifasiga noloyiq deb atadi. Bu haqda Xalq deputatlari viloyat kengashining navbatdagi sessiyasida so‘z yuritildi, deya xabar berdi “Daryo” muxbiri.
Ta’kidlanishicha, 27-oktabr kuni bo‘lib o‘tgan Xalq deputatlari Qashqadaryo viloyat kengashining navbatdagi sessiyasida O‘zbekiston Respublikasi Prezidentining “Mamlakatimiz ta’lim-tarbiya tizimini yanada takomillashtirish, ilm-fan sohasi rivojini jadallashtirishga oid qo‘shimcha chora-tadbirlar to‘g‘risida”gi Farmoni loyihasi muhokama qilingan.
Sessiyada so‘z olgan Zoir Mirzayev Chiroqchi tuman xalq ta’limi bo‘limi mudiri Farhod Jumanovga yuzlanib “Nimaga bor haqiqatni yashiryapsizlar?”, degan bo‘lsa, deputatlarga qarata “Nimaga Chiroqchidan saylangan deputatlar voqeaga munosabat ham bildirmadi?” deya kuyinib gapirgan.
“Qilmang bunaqa ishni, o‘tin kiritib qo‘yib, boshqa qilib. Kimga kerak bunaqa maynavozchilik? U — 61-maktab direktori vazifasiga noloyiq. Direktorni televideniyeda, OAVda chiqarish kerak — intervyu bersin. Qolgan maktab direktorlari bunday ko‘zbo‘yamachilik, spektakl qilmasin keyin. Bu holat qolganlarga maktab bo‘lsin”, — dedi Zoir Mirzayev.
Viloyat rahbari sessiya ishtirokchilaridan 61-maktab hududidan saylangan deputat kimligini so‘ragan. “O‘sha hududdan saylangan deputat, balki, hududingizda 61-maktab borligini bilmassiz?”, — dedi viloyat hokimi.
Sessiyada ishtirok etayotgan deputatlarning ma’lumot berishicha, Shodiyor Xo‘janazarov 61-maktab joylashgan hududdan viloyat kengashiga saylangan deputat bo‘lib, sessiyada ishtirok etmagan.
Qashqadaryo hokimi sessiya davomida Chiroqchidagi maktab haqida yozgan OAV vakillariga rahmat aytish kerakligini ta’kidlagan.
“Siz ommaviy axborot vositalariga rahmat deng, shuni yoritib bergani uchun. To‘g‘ri, bugun tanqidiy material chiqdi, ertaga ertalab hokimiyat borib hal qilib beradi degan tushunchadan voz kechish kerak”, degan hokim.
Zoir Mirzayevning ma’lumot berishicha, viloyatda 300 dan ortiq maktab filiallari bo‘lib, ularning 274 tasining kadastr hujjati ham mavjud emas.
“Yaqinda biz barcha tuman va viloyatning budjetini tasdiqlaymiz. Shunda moliyaning odamidan ‘61-maktabga necha pul berasan, mana bu maktabga qancha berasan? Bu maktab avariya holatida, bu maktabning hojatxonasi yo‘q’ deb kim so‘raydi. Deputatning shunday savol berishga haqqi bormi yoki yo‘qmi?”, deya so‘ragan viloyat hokimi.
Eslatib o‘tamiz, avvalroq Chiroqchidagi 61-maktabning qo‘rqinchli sinfxonalarida dars o‘tilayotgani tasvirlangan video va fotolar tarqaldi. Shundan so‘ng viloyat xalq ta’limi boshqarmasi hamda Chiroqchi tuman hokimligi holatni rad etib chiqdi. “Daryo” muxbiri bilan suhbatlashgan qishloq ahli esa ushbu sinfxonalarda o‘quvchilarga ikki yil davomida dars o‘tilganini bildirdi. Maktab direktori ham keyinchalik buni tasdiqlab, dastlab jamoatchilikni chalg‘itishga uringanini, yolg‘on ma’lumot berganini tan oldi.
Izoh (0)