Koronavirus pandemiyasidan jiddiy zarar ko‘rgan global savdo shu yilning uchinchi choragidan “oyoqqa tura boshladi”. Uning hajmi o‘tgan yilning shu davriga nisbatan 5 foizgagina qisqargan. Bu haqda BMTning Savdo va rivojlanish bo‘yicha konferensiyasiga (YuNKTAD) tayanib, BMT yangilik xizmati xabar berdi.
Ekspertlarning ta’kidlashicha, vaziyat yaxshilanganiga qaramay, savdo sohasidagi istiqbollar hamon mavhumligicha qolmoqda.
“Pandemiyaning noaniq yo‘nalishi yaqin oylar ichida oldingidek savdo istiqbollariga salbiy ta’sir ko‘rsatishni davom etadi. Ayrim ‘yashil o‘sish’larga qaramay, ba’zi mintaqalarda ishlab chiqarish jarayoni sekinlashgani yoki kutilmaganda qattiq karantin choralari joriy etilishi e’tibordan chetda qoldira olmaymiz”, — deydi YuNKTAD rahbari Mukisa Kituyi.
Ekspertlarning prognoziga ko‘ra, to‘rtinchi chorakda jahon savdosi 3 foizga qisqaradi, yillik savdolar hajmining qulash ko‘rsatkichi esa 7-9 foizni tashkil etadi.
YuNKTAD’ning ta’kidlashicha, ayniqsa, avtomobilsozlik va energetika sohalarga ko‘proq zarar ko‘rgan. Shu bilan birga, uy uchun mo‘ljallangan ofis jihozlari va kommunikatsiya qurilmalari — smartfonlar, kompyuterlar, noutbuklar, modem va routerlar savdosida o‘sish kuzatilgan.
Pandemiyaga qarshi kurashda kerak bo‘ladigan tibbiyot vositalari — niqoblar, respiratorlar, dezinfeksiya vositalari, kasalxonalar uchun qurilmalar savdosi hajmi ham sezilarli darajada oshgan. Xitoy, AQSh va Yevropa mamlakatlaridan amalga oshirilgan shu turdagi tovarlar eksporti yanvardagi 25 milliard dollardan may oyida 45 million dollarga qadar o‘sgan.
Butun dunyoda savdo hajmida qisqarish kuzatilayotgan bir vaqtda, Xitoyda aksincha — o‘sish qayd etilmoqda. Pandemiyadan keyingi dastlabki oylarda Xitoy eksporti ikkinchi chorakda barqarorlashgan, uchinchi chorakda esa 10 foizga o‘sgan.
“Umumiy hisobda Xitoy eksporti 2020-yilning dastlabki 9 oyida 2019-yilning mos davridagi ko‘rsatkichlarga erishgan”, — deyiladi hisobotda.
Shuningdek, sentabr oyida Janubiy Koreya (8 foiz) va Hindistonda (4 foiz) ham eksport hajmi oshgan.
Eslatib o‘tamiz, yanvar—sentabr oylari yakuniga ko‘ra, O‘zbekistonning tashqi savdo aylanmasi 27,49 milliard dollarni tashkil etdi. Bu 2019-yilning mos davriga nisbatan 12 foizga kam demak.
Izoh (0)