Tog‘li Qorabog‘ muammosini faqat tinch yo‘l bilan hal qilish mumkin. Bu haqda Armaniston tashqi ishlar vazirligi e’lon qilgan bayonotda aytiladi, deb yozadi “RBK”.
“Biz yana bir karra ta’kidlaymiz, Tog‘li Qorabog‘ nizosi faqatgina YeXHT Minsk guruhi hamraisligi doirasida — xalqaro mandatga ega formatda tinch yo‘l bilan tartibga solinishi mumkin”, — deya qayd etdi vazirlikdagilar.
Diplomatik muassasa qo‘shimcha qilishicha, Armaniston YeXHT Minsk guruhiga raisdosh mamlakatlar yetakchilari hamkorligida 10 va 17-oktabrda kelishilgan o‘t ochishni to‘xtatish haqidagi bitimlarning so‘zsiz bajarilishini qo‘llab-quvvatlaydi.
Shuningdek, Yerevan Ozarbayjon va Turkiyani o‘t ochishni to‘xtatish rejimini o‘rnatish bo‘yicha “xalqaro hamjamiyatning urinishlariga to‘sqinlik qilish siyosati”dan, shuningdek, “aybni Armaniston tomoniga ag‘darish”dan voz kechishga chaqirdi.
Avvalroq Armaniston bosh vaziri Nikol Pashinyan ushbu bosqichda Tog‘li Qorabog‘dagi nizoning diplomatik yechimi yo‘qligini ma’lum qilgandi. Uning so‘zlariga ko‘ra, Yerevan o‘z talablarini yengillashtirib, murosaga kelishga urindi, ammo Boku tomonidan javob qadami qo‘yilmadi.
U mamlakat aholisiga qilgan murojaatida xalqni qo‘lga qurol olib, vatanni himoya qilishga chaqirdi. “Asosiy maqsadimiz oxirigacha kurashish va xalqimiz manfaatlarini himoya qilishdan iborat. Bugun Ozarbayjon egallab turgan pozitsiya birinchi navbatda qo‘lga qurol olish va vatanni himoya qilishni taqozo etmoqda”, — dedi u.
Turkiya esa Boku iltimos qilsa, “ikkilanmasdan” Ozarbayjonga askarlarini jo‘natishi va harbiy ko‘mak berishini ma’lum qildi.
Eslatib o‘tamiz, Tog‘li Qorabog‘dagi harbiy harakatlar tinchlikka erishish uchun qilingan ikkita urinishga qaramasdan, 27-sentabrdan buyon davom etmoqda. Ozarbayjon va Armaniston 10-oktabr kuni soat 12:00 dan boshlab Tog‘li Qorabog‘da o‘t ochishni to‘xtatish to‘g‘risida kelishib olgandi. Ammo shu kuni keyinroq Armaniston va Ozarbayjon Mudofaa vazirliklari bir-birini Tog‘li Qorabog‘da o‘t ochishni to‘xtatish rejimini buzishda aybladi.
19-oktabrda Armaniston bosh vaziri Nikol Pashinyan va Ozarbayjon prezidenti Ilhom Aliyev Tog‘li Qorabog‘dagi mojaro bo‘yicha muzokaralar o‘tkazishga tayyorligini ma’lum qilgan. Keyinroq Pashinyan Tog‘li Qorabog‘da Rossiya uchun bevosita xavf soluvchi Suriya terrorchilik guruhlari jangarilari bo‘lganligi uchun Moskva u yerda aksilterrorchilik operatsiyalarini o‘tkazish uchun asosga ega ekanligini aytgan.
Izoh (0)