Rossiyada so‘nggi sutkada 15 971 kishida koronavirus qayd etildi, deb xabar bermoqda Meduza koronavirusga qarshi kurash bo‘yicha tezkor shtabga tayanib. Bir kun avval 15 700 kishida COVID-19 aniqlangani haqida xabar berilgandi, 20-oktabr kuni esa 16 3019 kishida virus aniqlanib, kasallanganlar soni kunlik ortishi bo‘yicha rekord o‘rnatilgandi.
Yangi kasallanganlar soni bo‘yicha Moskva — 4413 ta holat (bir kun avval 4389 ta bo‘lgandi) va Sankt-Peterburg — 697 ta yangi holat (bir kun avval 684 ta holat edi) yetakchilik qilmoqda. Moskva koronavirusdan o‘limlar soni bo‘yicha ham birinchi o‘rinda. Rossiyadagi COVID-19 qurbonlarining chorak qismi aynan Moskva shahriga to‘g‘ri keladi. Bir oy ichida Moskvada kasallanish holatlari besh martadan ko‘proq o‘sgan. Kasalxonalarga eng og‘ir bemorlar yotqizilmoqda.
Rossiyada koronavirus tarqalishi boshlanganidan buyon 1 463 306 nafar kishida kasallik qayd etilgan. Ularning 1 107 988 nafari, shu jumladan, o‘tgan sutka davomida bemorlarning 11 428 nafari sog‘aygan.
Sutka davomida 290 kishi, pandemiya boshlanganidan buyon esa Rossiyada 25 242 kishi COVID-19 qurboni bo‘lgan. Mamlakatda 13-oktabrdan boshlab sutka davomida virus qurbonlari soni 200 kishidan ortiq bo‘lmoqda.
“Rospotrebnadzor” ma’lumotlariga ko‘ra, Rossiyada koronavirusni aniqlash bo‘yicha so‘nggi 24 soat davomida 512 mingta, umumiy hisobda esa 55,6 millionta test o‘tkazilgan.
Izoh (0)