Коронавирусдан ҳимояланишда қўлқоп тақишнинг самараси антисептикларга қараганда самарасизроқ чора деб айтган Россия бош инфекционисти Владимир Чуланов кейинчалик иккала усул самарадорлиги тенг эканлигини айтди. Бу ҳақда Meduza хабар бермоқда.
21 октябрь куни «Интерфакс» Владимир Чулановнинг қўлқоп тақиш антисептикларга қараганда самарасизроқ деб айтганини эълон қилганди. Инфекционист ҳамма ҳам ундан тўғри фойдаланмаслигини, бу эса инфекция юқтириш хавфини оширишини таъкидлаб, қўлқоп тақишни ортиқча чора деб айтганди. Инфекционист, шунингдек, айримлар қўлқопларни ташлаб юбормасдан узоқ вақт тақаётганини, бу уларни ҳеч нимадан ҳимоя қилмаслигини, аксинча хавф пайдо қилишини билдирган.
«Вирус, асосан, (90 фоиз) ҳаво томчилари орқали юқади ва фақат 10 фоиз ҳолатдагина контакт йўли билан, яъни вирус қолган жойга қўл билан тегиш ва уни кўз, оғизга теккизиш орқали юқади. Ушбу 10 фоиз муҳим рол ўйнамайди. Менинг назаримда, коронавируснинг контакт йўл билан юқишининг олдини олишда энг самарали усул бу — жамоат транспортига кириш-чиқишда қўлни антисептик воситалар билан артишдир», — деганди Владимир Чуланов.
Кейинроқ у ўз сўзларини «ТАСС»га изоҳлаб, тўғри фойдаланилса, қўлқоплар ҳам, антисептиклар ҳам бир хил самара беришини айтган. Қўлқоплар бир марталик бўлиши керак, ундан қайта фойдаланиб бўлмайди. Шунингдек, уни эҳтиёткорлик билан ечиб утилизация қилиш лозим. Қолаверса, қўлқопли қўллар билан юзга тегмаслик лозим. «Бир қўл билан қўлқоп манжетини ушлаб, бошқа қўл билан эса иккинчи пой манжетни ушлаб ифлосланган юзасини ичкарида қоладиган қилиб қайирамиз. Кейин қўлқоплар контейнерларда утилизация қилинади, имкон қадар у ёпиладиган чиқинди контейнери бўлгани маъқул», — деб тушунтирган Чуланов.
Москвада 12 майдан бошлаб жамоат жойларда, шу жумладан, жамоат транспортида ниқоб ва қўлқоп тақиш мажбурий этиб белгиланган. Фақат уйда ёки алоҳида кабинетда ўтиргандагина ниқоб ва қўлқоп тақмаслик мумкин. Унга риоя қилмаганлар 4 минг рублдан 5 минг рублгача (тахминан, 500 мингдан 700 минг сўмгача) жаримага тортилади.
Тошкентда ҳам турли юқумли мавсумий инфекциялар тарқалишининг олдини олиш ва йўловчилар саломатлигини асраш мақсадида 19 октябрдан бошлаб жамоат транспорти (автобус, метро, йўналишли такси) хизматидан фойдаланганда йўловчиларнинг тиббий ниқоб ва қўлқопда бўлиш тартиби жорий этилди. Улар йўловчиларга бепул тақдим этилади. Тарқатиладиган тиббий қўлқоплар транспорт корхоналари ҳисобидан, яъни давлат томонидан қопланади.
ЖССТ «Қўлқоп тақиш керакми?», деган саволга «Йўқ, сизни COVID-19’дан резина қўлқопдан кўра, қўлларни совунлаб ювиш яхшироқ ҳимоя қилади» деб жавоб берганди. Алоҳида экспертлар ҳам ушбу фикрни маъқуллаган.
Изоҳ (0)