Futbol bo‘yicha Xitoy chempionati doirasida “Tyanszin Teda” 21-oktabr, chorshanba kuni “Shenchjen” maydonida mehmon bo‘ldi.
Uchrashuvning 28-daqiqasida Jon Mari mezbonlarni oldinga olib chiqqan bo‘lsa, 75-daqiqada Odil Ahmedovning uzatmasidan keyin Feliks Bastians muvozanatni tikladi. O‘zbekistonlik futbolchi bu o‘yinda to‘liq harakat qildi.
“Tyanszin Teda” ilk o‘yindagi g‘alaba (2:0) evaziga pley-offning keyingi bosqichiga yo‘l oldi.
Shu tariqa “Tyanszin Teda” ligadagi o‘rnini saqlab qoldi va endilikda 9—12-o‘rinlar uchun kurashda ishtirok etadi.
Ma’lumot uchun, Xitoy Superligasi koronavirus pandemiyasi sabab 2020-yilda ikki guruhga bo‘lingan holda o‘tkazildi. Guruhlarda dastlabki to‘rt o‘rinni qo‘lga kiritgan jamoalar chempionlik uchun pley-off tizimida bahs olib boradi. Quyidagi jamoalar esa xuddi shu tizimda ligada jon saqlab qolish uchun kurashadi.
Eslatib o‘tamiz, Ahmedov jamoasi 2020-yilgi mavsumning 14 o‘yinida 3 ochko to‘plab, B guruhida so‘nggi, 8-o‘rinni egalladi. “Shenchjen” esa 17 ochko bilan A Guruhida 5-pog‘onadan joy oldi.
Xitoy Superligasi
9—16-o‘rinlar uchun pley-off bahslari
21-oktabr, chorshanba
“Shenchjen” — “Tyanszin Teda” 1:1
Gollar: 1:0 – 28 Mari, 1:1 – 75 Bastians.Ilk o‘yin — 0:2
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)