Футбол бўйича Хитой чемпионати доирасида «Тяньцзинь Тэда» 21 октябрь, чоршанба куни «Шэньчжэнь» майдонида меҳмон бўлди.
Учрашувнинг 28-дақиқасида Жон Мари мезбонларни олдинга олиб чиққан бўлса, 75-дақиқада Одил Аҳмедовнинг узатмасидан кейин Феликс Бастианс мувозанатни тиклади. Ўзбекистонлик футболчи бу ўйинда тўлиқ ҳаракат қилди.
«Тяньцзинь Тэда» илк ўйиндаги ғалаба (2:0) эвазига плей-оффнинг кейинги босқичига йўл олди.
Шу тариқа «Тяньцзинь Тэда» лигадаги ўрнини сақлаб қолди ва эндиликда 9—12-ўринлар учун курашда иштирок этади.
Маълумот учун, Хитой Суперлигаси коронавирус пандемияси сабаб 2020 йилда икки гуруҳга бўлинган ҳолда ўтказилди. Гуруҳларда дастлабки тўрт ўринни қўлга киритган жамоалар чемпионлик учун плей-офф тизимида баҳс олиб боради. Қуйидаги жамоалар эса худди шу тизимда лигада жон сақлаб қолиш учун курашади.
Эслатиб ўтамиз, Аҳмедов жамоаси 2020 йилги мавсумнинг 14 ўйинида 3 очко тўплаб, Б гуруҳида сўнгги, 8-ўринни эгаллади. «Шэньчжэнь» эса 17 очко билан А Гуруҳида 5-поғонадан жой олди.
Хитой Суперлигаси
9—16-ўринлар учун плей-офф баҳслари
21 октябрь, чоршанба
«Шэньчжэнь» — «Тяньцзинь Тэда» 1:1
Голлар: 1:0 – 28 Мари, 1:1 – 75 Бастианс.Илк ўйин — 0:2
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)