Favqulodda vaziyatlar bo‘yicha Amerika federal agentligi (FEMA) Rossiya koronavirusga qarshi kurash uchun “gumanitar yordam” sifatida AQShga yuborgan 45 ta “Aventa-M” sun’iy nafas oldirish apparatini utilizatsiya qildi, deb xabar bermoqda Meduza.
FEMA rasmiy vakili BuzzFeed News’ga ma’lum qilishicha, sun’iy nafas oldirish apparatlari “xavfli chiqindilarni utilizatsiya qilish bo‘yicha qat’iy normativ talablarga muvofiq” utilizatsiya qilingan. Bu qachon bo‘lib o‘tganligiga aniqlik kiritilmagan.
Apparatlar AQShda ishlatilmagan ham. Birinchidan, ular qo‘llanilgan Moskvadagi ikkita kasalxonada yong‘inlar sodir bo‘lgan. Ikkinchidan, boshqacha kuchlanish darajasiga moslashgani sababli: apparatlardan adapterlarsiz foydalanib bo‘lmasdi, Amerika klinikalarida esa ular yo‘q edi.
Sun’iy nafas oldirish apparatlari va boshqa tibbiy mahsulotlar ortilgan samolyot Rossiyadan AQShga aprel boshida uchgan edi. Kreml buni “gumanitar xususiyatga ega yordam” deb atadi.
Ma’lumot uchun, “Aventa-M” sun’iy nafas oldirish apparatlari 2020-yilning 1-aprelidan boshlab ishlab chiqarilgan. Undan Moskva va Sankt-Peterburg kasalxonalarida foydalanilgan bo‘lib, 9 va 12-may kuni jami 7 nafar bemorning umriga zomin bo‘lgan yong‘in sodir bo‘lgandi. Voqeadan so‘ng Rosdravnadzor 12-maydan boshlab tergov jarayoni davomida ushbu apparatlardan foydalanishni vaqtinchalik cheklagan.
May oyida O‘zbekistonda foydalanilayotgan “Aventa-M” sun’iy nafas oldirish apparatlari sinovdan o‘tkazilgan va e’tirozga sabab bo‘luvchi va hech qanday salbiy jihatlari qayd etilmagan edi.
Izoh (0)