Afg‘onistonga tashrifi doirasida O‘zbekiston bosh vaziri o‘rinbosari – investitsiyalar va tashqi savdo vaziri Sardor Umurzoqov rahbarligidagi O‘zbekiston hukumati delegatsiyasi 2020-yilning 20-oktabr kuni Kobul shahrida bo‘lib o‘tgan O‘zbek tili kunini nishonlashda qatnashdi. Afg‘oniston tomonidan tadbirda Afg‘oniston prezidenti Ashraf G‘ani hamda mamlakatning oliy rahbariyati ishtirok etdi. Bu haqda Investitsiyalar va tashqi savdo vazirligi xabar qilmoqda.
Ma’lum qilinishicha, tadbir davomida jahon sivilizatsiyasi rivojiga ulkan hissa qo‘shgan ikki mamlakat xalqlarining umumiy ajdodlarining madaniy merosini asrab-avaylashga katta e’tibor qaratgani uchun O‘zbekiston hukumati nomidan do‘st bo‘lgan Afg‘oniston hukumati va xalqiga chuqur minnatdorchilik bildirildi.
Tadbirda O‘zbekiston Prezidentining tabrigi o‘qib eshittirildi, unda o‘zbek va afg‘on xalqlarining tarixiy taraqqiyoti yagona ilmiy va madaniy makon va zamonda ro‘y berganligi madaniyat va an’analarning yaqinligini saqlab qolish, shuningdek, ikki mamlakat o‘rtasida mustahkam do‘stona munosabatlarning shakllanishi uchun shart-sharoitlar vujudga kelishiga imkon bergani alohida ta’kidlandi.
Shu bilan birga, O‘zbekiston–Afg‘oniston munosabatlari rivojida muhim qadam bo‘lgan ushbu tadbir kelgusidagi madaniy, ilmiy va gumanitar hamkorlikni faollashtirish uchun kuchli rag‘batlantiruvchi omil bo‘lishiga qaratilganligini ta’kidladilar.
Tadbirda Afg‘oniston prezidenti Ashraf G‘ani va Afg‘oniston jamoatchiligi a’zolari ham so‘zga chiqdi.
Qayd etilishicha, Afg‘onistonda 21-oktabr – rasmiy jihatdan bayram kuni – O‘zbek tili kuni deb e’lon qilingan. Afg‘oniston Konstitutsiyasiga mamlakatning rasmiy tillaridan biri sifatida kiritilgan o‘zbek tili Afg‘onistonning 10 viloyatida keng tarqalgan va yildan-yilga ommalashib bormoqda. Afg‘onistonda o‘zbek tilida bir nechta tele va o‘nlab radiokanallar efirga uzatiladi.
Afg‘onistonga tashrifi davomida Sardor Umurzoqov Afg‘oniston prezidenti Ashraf G‘ani bilan uchrashuv o‘tkazdi. Unda siyosiy-diplomatik, savdo-iqtisodiy, investitsiyaviy, sanoat, mintaqaviy va madaniy-gumanitar sohalarida hamkorlik qilish masalalarining keng doirasi muhokama qilindi.
Shuningdek, Sardor Umurzoqov Afg‘oniston tashqi ishlar vaziri Muhammad Xanif Atmar bilan ham uchrashuv o‘tkazib, transport-logistika, energetika, ta’lim va boshqa sohalarda qo‘shma loyiha va tashabbuslarni amalga oshirish belgilandi.
Avvalroq Shavkat Mirziyoyev o‘zbek tilini rivojlantirish bo‘yicha 2030-yilgacha mo‘ljallangan chora-tadbirlar to‘g‘risidagi farmonni imzolagani xabar qilingandi.
Izoh (0)