Qozog‘iston parlamenti majlisi (quyi palatasi)ga saylovlar 2021-yil 10-yanvarda bo‘lib o‘tadi. Tegishli farmon respublika prezidenti Qosim-Jo‘mart To‘qayev tomonidan imzolandi, deb yozadi “RBK”.
“Bugun men parlament majlisi deputatlari saylovini belgilash haqida farmon imzoladim. Markaziy saylov komissiyasi qarori bilan barcha darajadagi maslixatlar deputatlari saylovlari belgilandi. Bo‘lg‘usi saylovlar konstitutsiyaviy muddatlarda 2021-yilning 10-yanvarida bo‘lib o‘tadi”, — dedi To‘qayev qozog‘istonliklarga yo‘llagan murojaatida.
Uning so‘zlariga ko‘ra, mamlakatda parlament muxolifati instituti joriy etilgan, unga, xususan, bitta sessiya davomida kamida bir marta parlament eshituvlarini o‘tkazishga tashabbuskorlik qilish, shuningdek, bitta sessiya mobaynida kamida ikki marta hukumat soati kun tartibini belgilash huquqi beriladi. Partiya ro‘yxatlarida birinchi marta ayollar va yoshlar uchun 30 foizli kvota paydo bo‘lgan.
Bundan tashqari, maslixatlar — mahalliy vakillik organlariga bo‘lg‘usi saylovlar birinchi marta partiya ro‘yxatlari bo‘yicha bo‘lib o‘tadi. Qozog‘iston yetakchisi fuqarolarni faol fuqarolik pozitsiyasini namoyon etib, bo‘lajak saylovlarda ovoz berishga chaqirdi.
2-may kuni To‘qayev Darig‘a Nazarboyevaning vakolatlarini tugatib, uni parlament spikerligidan ozod qilgandi. Darig‘a Nazarboyevaning senatorlik vakolatlari nima sababdan tugatilgani ma’lum qilinmagan. Darig‘a Nazarboyeva 2019-yil 20-martdan beri Qozog‘iston Senati spikeri sifatida faoliyat ko‘rsatib kelayotgan edi. To‘qayev uni 2019-yil avgustida senatorlikka qayta tayinlagan, sentabrda esa u Senat raisi lavozimiga qayta saylangan edi.
Avvalroq Qozog‘istonda karantin cheklovlarini kuchaytirish bo‘yicha bir qator yangi qarorlar qabul qilingan edi.
Izoh (0)