Rossiyaning Volgograd viloyati Voljskiy shahridan O‘zbekiston fuqarolarini Toshkentga olib kelish uchun oktabr oyining oxiri va noyabr oyining boshida to‘qqizta maxsus poyezd tashkil qilinadi. Bu haqda Voljskiy shahri temir yo‘llari kompaniyasiga tayanib, “Interfaks” xabar berdi.
Ma’lum qilinishicha, poyezdlar “Voljskiy” bekatidan 22, 23, 25, 26, 28, 29, 31-oktabr, shuningdek, 1 va 2-noyabr kunlari yo‘lga chiqadi. Har bir poyezd tarkibida 20 tadan vagon bo‘lib, ular 938 nafar yo‘lovchini qabul qilishga mo‘ljallangan. Poyezdlar Rossiya hududi bo‘ylab to‘xtamasdan harakat qiladi.
Yo‘lovchilar chiptalarni temiryo‘l kassalaridan O‘zbekiston fuqaroligini tasdiqlovchi hujjatni taqdim etgan holda xarid qilishi mumkin. Bundan tashqari, chiptalarni internet orqali ham sotib olish mumkin.
Nashrning yozishicha, Rossiya Transport vazirligi hamda “Rossiya temir yo‘llari” sentabr oyining oxirida va oktabr oyining boshida O‘zbekiston fuqarolarini o‘z uyiga qaytarish uchun Voljskiy—Toshkent yo‘nalishida o‘nta maxsus poyezd tashkil qilgan va umumiy hisobda 11 mingdan ortiq o‘zbekistonlik o‘z yurtiga qaytarilgan.
Avvalroq O‘zbekiston fuqarolarini vatanga qaytarish uchun Volgograd viloyatidagi “Voljskiy” bekatidan 15, 18, 22, 25, 28-oktabr kunlari, shuningdek, 1 va 2-noyabr kunlari poyezdlar yo‘lga chiqishi haqida xabar berilgandi.
Izoh (0)