O‘zbekiston Prezidentining 20-oktabrdagi farmoni bilan Boriy Alixonov hamda Narimon Umarov Oliy Majlisi Senati a’zolari etib tayinlandi. Bu haqda Markaziy saylov komissiyasi matbuot xizmati xabar berdi.
Ma’lum qilinishicha, 20-oktabr kuni Markaziy saylov komissiyasining navbatdagi majlisida Oliy Majlisining Qonunchilik palatasi deputatlari Boriy Alixonov va Narimon Umarovning bergan yozma arizasiga asosan ularning deputatlik vakolati muddatidan ilgari tugatilgan.
Shuningdek, O‘zbekiston Prezidentining “O‘zbekiston Respublikasi Oliy Majlisi Senati a’zolarini tayinlash to‘g‘risida”gi 2020-yil 20-oktabrdagi farmoniga asosan hamda Saylov kodeksining 14, 16 va 75-moddalariga muvofiq Markaziy saylov komissiyasi Boriy Alixonov va Narimon Umarovni Oliy Majlisi Senati a’zolari etib ro‘yxatga olgan.
Narimon Umarov Senatning Sud-huquq masalalari va korrupsiyaga qarshi kurashish qo‘mitasi raisi etib saylangan. Boriy Alixonov esa Senatning yangi tashkil etilgan Orolbo‘yi mintaqasini rivojlantirish masalalari qo‘mitasi raisi etib saylangan
Ma’lumot uchun, O‘zbekiston Konstitutsiyasining 77-moddasida Senatning 16 nafar a’zosi fan, san’at, adabiyot, ishlab chiqarish sohasida hamda davlat va jamiyat faoliyatining boshqa tarmoqlarida katta amaliy tajribaga ega bo‘lgan hamda alohida xizmat ko‘rsatgan eng obro‘li fuqarolar orasidan Prezident tomonidan tayinlanishi belgilangan.
Eslatib o‘tamiz, shu yilning yanvar oyida Prezidenti Shavkat Mirziyoyev tomonidan imzolangan Oliy Majlis Senati a’zolarini tayinlash to‘g‘risidagi farmon bilan 13 nafar senator tayinlangan.
Mavzuga doir: O‘zbekistonning eng keksa senatori vafot etdi
Izoh (0)