Сенатнинг саккизинчи ялпи мажлисида Қорақалпоғистон Жўқорғи Кенгеси раиси Мурат Камалов Ўзбекистон Сенати раиси ўринбосари этиб сайланди.
Камаловга электрон тизим орқали яширин овоз бериш йўли билан мажлисда иштирок этаётган 78 нафар сенаторнинг 72 нафари ёқлаб овоз берган. 6 нафар сенатор техник хато туфайли овоз бера олмагани айтилди.
Маълумки, Сенат раиси ўринбосарларидан бири Қорақалпоғистон вакили бўлишига оид конституцион норма мавжуд. Шу боис сенатор Мурат Каллибекович Камаловни Сенат раиси ўринбосари лавозимига сайлаш тўғрисида таклиф Президент томонидан тақдимнома киритилган эди.
Мурат Камалов 1955 йилда Нукус шаҳрида туғилган. Олий маълумотга эга ҳуқуқшунос сифатида кўп йиллар турли лавозимларда фаолият юритган.
65 ёшли Мурат Камалов 2020 йил 20 сентябрь куни бўлиб ўтган навбатдан ташқари сайловлар вақтида Жўқорғи Кенгес депутати этиб сайланган эди. Сайловлар арафасида эълон қилинган номзодлар рўйхатидаги маълумотларга кўра, Экопартия аъзоси ҳисобланган Камалов сайловгача Президент ҳузуридаги Оролбўйи халқаро инновация маркази директори лавозимида ишлаб келган.
Мавзуга доир: Қорақалпоғистон собиқ раҳбарининг ўғли, республика ДХХ собиқ раҳбари. Мурат Камалов ҳақида
11 октябрь куни Қорақалпоғистон Жўқорғи Кенгеси, халқ депутатлари туман ва шаҳар кенгашларининг бўшаб қолган ўринларга Ўзбекистон Сенати аъзоларини сайлаш бўйича қўшма мажлисда эса Мурат Камалов сенатор этиб сайланган.
Қорақалпоғистоннинг Мурат Камаловдан аввалги раҳбари ҳисобланган Муса Ерниязов 2020 йил 31 июль куни коронавирус инфекцияси асоратлари оқибатида вафот этган эди.
Изоҳ (0)