Navoiy viloyatining Konimex tumanidagi 2-sonli “Oltin kalit” davlat maktabgacha ta’lim tashkiloti 2020-yilning fevral oyida foydalanishga topshirilib, uning qurilishiga 4 milliard so‘m sarflangani va oradan 8 oy o‘tgach muassasa ta’mirtalab ahvolga kelib qolgani haqida xabar berilgandi.
Mazkur holat yuzasidan batafsil ma’lumot olish maqsadida Maktabgacha ta’lim vazirligi matbuot kotibi bilan bog‘langan “Gazeta.uz”ning yozishicha, u bolalar bog‘chasi faoliyati mart oyida boshlangan karantindan beri hozirgi kunda qadar qayta tiklanmaganini ma’lum qilgan.
Vazirlik matbuot kotibi Navoiy viloyati maktabgacha ta’lim boshqarmasining holat yuzasidan bergan ma’lumotnomasini ham taqdim etgan. Xatda keltirilishicha, bolalar bog‘chasi 2018-yilda maktabgacha ta’lim muassasalarini rekonstruksiya qilishning manzilli dasturiga tushgan va muassasa uchun 125 o‘rinli qo‘shimcha blokni yonma-yon qurish belgilangan.
Shuningdek, ijtimoiy tarmoqlarda xabar tarqalishidan avvalroq — 13-oktabr kuni Navoiy viloyati Maktabgacha ta’lim boshqarmasi boshlig‘i, viloyat hokimligi “Yagona buyurtmachi xizmati” IK direktori va Konimex tuman MTB mudiri joyga chiqqan holda tafsilotlarni o‘rganishgani qayd etilgan.
Ma’lum bo‘lishicha, tender savdolarida “Navoiy GRES qurilish” UK qurilish kompaniyasi yutib chiqqan, lekin obyekt qurilishi muddatini kechiktirgani va boshqa sabablarga ko‘ra, sudning tegishli qarori bilan ushbu kompaniya bilan shartnoma bekor qilingan. Obyektdagi yakuniy qurilish ishlari esa tegishli qaror asosida “Baraka bino” MChJga olib berilgan va bino qurilishi 2019-yilda yakunlanib, foydalanishga topshirilgan.
Boshqarma ma’lumotnomasida haqiqatan ham bugungi kunda ushbu obyektning ichki qismidagi ayrim qo‘shimcha devorlarida yoriqlar borligi aniqlangani qayd etilmoqda. Mazkur maktabgacha ta’lim tashkilotining faoliyati shu yilning 16-mart sanasidan buyon to‘xtatilgan.
Boshqarma ma’lumotnomasida “Shuningdek, ushbu maqola va video lavhadagi (ijtimoiy tarmoq va internet nashrlari haqida gap ketyapti) ayrim vajlar (ma’lumotlar) asossiz va haqiqatga to‘g‘ri kelmasligini ma’lum qilamiz”, — deyiladi.
“Xat davomida bolalar bog‘chasining eski binosiga oid nosozliklar haqida ham gap bormoqda. Lekin boshqarma ma’lumotnomasi mazmunidan anglash mumkinki, ijtimoiy tarmoqlarda muhokamalarga sabab bo‘lgan mavzu bolalar bog‘chasining 4 milliard so‘mga bunyod etilgan yangi binosiga borib taqalmoqda”, — deb yozadi “Gazeta.uz”.
Qayd etilishicha, DMTTning yangi binosi tantanali ochilishdan so‘ng, faoliyat yuritgan yoki yuritmaganini aniqlash maqsadida Navoiy viloyati Maktabgacha ta’lim boshqarmasi boshlig‘i O‘tkir Tillayev bilan bog‘lanilgan. Uning ma’lum qilishicha, bog‘chaning yangi binosi to‘liq foydalanishga topshirilgan va karantin e’lon qilinguncha, ya’ni 16-mart sanasiga qadar ishlagan.
Nashr manbasi bolalar bog‘chasining yangi binosini Navoiy viloyati hokimligining “Yagona buyurtmachi xizmati” injiniring kompaniyasi boshchiligidagi 7 kishidan iborat komissiyasi qabul qilib olganini aytmoqda. Devordagi yoriqlar esa tender savdolarida yutib chiqib, ishni oxiriga yetkaza olmagan “Navoiy GRES qurilish” UK qurilish kompaniyasining aybi sifatida ko‘rilmoqda.
Ushbu holatga aniqlik kiritish maqsadida viloyat hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari Bekzod Bobomurodov bilan bog‘lanilgan. Uning ta’kidlanishicha,“Navoiy GRES qurilish” UK qurilish kompaniyasi avvaliga 90 foiz ishni amalga oshirgan va bankrotlik holatiga kelib qolgan. Devordagi yoriqlar esa rostan ham ushbu qurilish kompaniyasi ishi bo‘lib chiqmoqda. “Yagona buyurtmachi xizmati” injiniring kompaniyasi komissiyasi qurilishdan so‘ng obyektni qabul qilib olganini tasdiqlagan.
Hokim o‘rinbosarining ishontirishicha, obyektdagi qolgan 10 foiz bunyodkorlik ishlari boshqa qurilish kompaniyasi tomonidan amalga oshirilgan va bugungi kunga kelib aniqlangan kamchiliklar to‘liq bartaraf etilgan.
Avvalroq Toshkentning Anhor kanali ustidagi piyodalar ko‘prigi ustunlari yemirilayotgani tasvirlangan suratlar tarqalgan holat yuzasidan “O‘zbekiston temir yo‘llari” izoh bergandi. Undan avval Chirchiq daryosi ustiga qurilgan ko‘prik yaroqsiz holga kelayotgani tasvirlangan video yuzasidan holat voqea joyiga borib, mutaxassislar ishtirokida o‘rganilgandi. Ekspertlarning xulosasiga ko‘ra, ko‘prik atrofdagi shag‘al qazuvchilar sabab yaroqsiz holga kelib qolgan.
Shu yilning sentabr oxirlarida esa Surxondaryoning Qumqo‘rg‘on tumanidagi 6,5 milliard so‘mga qurib bitkazilgan ko‘prik hech qancha vaqt xizmat ko‘rsatmay qulab tushgani to‘g‘risida xabar berilgandi. Keyinroq viloyat hokimligi sifatsiz ko‘prik qurgan quruvchi ishini dastlab jinoyat ishi ochishni rad etgan transport prokuraturasi o‘rganayotganini ma’lum qilgandi.
Izoh (0)