Навоий вилоятининг Конимех туманидаги 2-сонли «Олтин калит» давлат мактабгача таълим ташкилоти 2020 йилнинг февраль ойида фойдаланишга топширилиб, унинг қурилишига 4 миллиард сўм сарфлангани ва орадан 8 ой ўтгач муассаса таъмирталаб аҳволга келиб қолгани ҳақида хабар берилганди.
Мазкур ҳолат юзасидан батафсил маълумот олиш мақсадида Мактабгача таълим вазирлиги матбуот котиби билан боғланган «Gazeta.uz»нинг ёзишича, у болалар боғчаси фаолияти март ойида бошланган карантиндан бери ҳозирги кунда қадар қайта тикланмаганини маълум қилган.
Вазирлик матбуот котиби Навоий вилояти мактабгача таълим бошқармасининг ҳолат юзасидан берган маълумотномасини ҳам тақдим этган. Хатда келтирилишича, болалар боғчаси 2018 йилда мактабгача таълим муассасаларини реконструкция қилишнинг манзилли дастурига тушган ва муассаса учун 125 ўринли қўшимча блокни ёнма-ён қуриш белгиланган.
Шунингдек, ижтимоий тармоқларда хабар тарқалишидан аввалроқ — 13 октябрь куни Навоий вилояти Мактабгача таълим бошқармаси бошлиғи, вилоят ҳокимлиги «Ягона буюртмачи хизмати» ИК директори ва Конимех туман МТБ мудири жойга чиққан ҳолда тафсилотларни ўрганишгани қайд этилган.
Маълум бўлишича, тендер савдоларида «Навоий ГРЭС қурилиш» УК қурилиш компанияси ютиб чиққан, лекин объект қурилиши муддатини кечиктиргани ва бошқа сабабларга кўра, суднинг тегишли қарори билан ушбу компания билан шартнома бекор қилинган. Объектдаги якуний қурилиш ишлари эса тегишли қарор асосида «Барака бино» МЧЖга олиб берилган ва бино қурилиши 2019 йилда якунланиб, фойдаланишга топширилган.
Бошқарма маълумотномасида ҳақиқатан ҳам бугунги кунда ушбу объектнинг ички қисмидаги айрим қўшимча деворларида ёриқлар борлиги аниқлангани қайд этилмоқда. Мазкур мактабгача таълим ташкилотининг фаолияти шу йилнинг 16 март санасидан буён тўхтатилган.
Бошқарма маълумотномасида «Шунингдек, ушбу мақола ва видео лавҳадаги (ижтимоий тармоқ ва интернет нашрлари ҳақида гап кетяпти) айрим важлар (маълумотлар) асоссиз ва ҳақиқатга тўғри келмаслигини маълум қиламиз», — дейилади.
«Хат давомида болалар боғчасининг эски биносига оид носозликлар ҳақида ҳам гап бормоқда. Лекин бошқарма маълумотномаси мазмунидан англаш мумкинки, ижтимоий тармоқларда муҳокамаларга сабаб бўлган мавзу болалар боғчасининг 4 миллиард сўмга бунёд этилган янги биносига бориб тақалмоқда», — деб ёзади «Gazeta.uz».
Қайд этилишича, ДМТТнинг янги биноси тантанали очилишдан сўнг, фаолият юритган ёки юритмаганини аниқлаш мақсадида Навоий вилояти Мактабгача таълим бошқармаси бошлиғи Ўткир Тиллаев билан боғланилган. Унинг маълум қилишича, боғчанинг янги биноси тўлиқ фойдаланишга топширилган ва карантин эълон қилингунча, яъни 16 март санасига қадар ишлаган.
Нашр манбаси болалар боғчасининг янги биносини Навоий вилояти ҳокимлигининг «Ягона буюртмачи хизмати» инжиниринг компанияси бошчилигидаги 7 кишидан иборат комиссияси қабул қилиб олганини айтмоқда. Девордаги ёриқлар эса тендер савдоларида ютиб чиқиб, ишни охирига етказа олмаган «Навоий ГРЭС қурилиш» УК қурилиш компаниясининг айби сифатида кўрилмоқда.
Ушбу ҳолатга аниқлик киритиш мақсадида вилоят ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Бекзод Бобомуродов билан боғланилган. Унинг таъкидланишича,«Навоий ГРЭС қурилиш» УК қурилиш компанияси аввалига 90 фоиз ишни амалга оширган ва банкротлик ҳолатига келиб қолган. Девордаги ёриқлар эса ростан ҳам ушбу қурилиш компанияси иши бўлиб чиқмоқда. «Ягона буюртмачи хизмати» инжиниринг компанияси комиссияси қурилишдан сўнг объектни қабул қилиб олганини тасдиқлаган.
Ҳоким ўринбосарининг ишонтиришича, объектдаги қолган 10 фоиз бунёдкорлик ишлари бошқа қурилиш компанияси томонидан амалга оширилган ва бугунги кунга келиб аниқланган камчиликлар тўлиқ бартараф этилган.
Аввалроқ Тошкентнинг Анҳор канали устидаги пиёдалар кўприги устунлари емирилаётгани тасвирланган суратлар тарқалган ҳолат юзасидан «Ўзбекистон темир йўллари» изоҳ берганди. Ундан аввал Чирчиқ дарёси устига қурилган кўприк яроқсиз ҳолга келаётгани тасвирланган видео юзасидан ҳолат воқеа жойига бориб, мутахассислар иштирокида ўрганилганди. Экспертларнинг хулосасига кўра, кўприк атрофдаги шағал қазувчилар сабаб яроқсиз ҳолга келиб қолган.
Шу йилнинг сентябрь охирларида эса Сурхондарёнинг Қумқўрғон туманидаги 6,5 миллиард сўмга қуриб битказилган кўприк ҳеч қанча вақт хизмат кўрсатмай қулаб тушгани тўғрисида хабар берилганди. Кейинроқ вилоят ҳокимлиги сифатсиз кўприк қурган қурувчи ишини дастлаб жиноят иши очишни рад этган транспорт прокуратураси ўрганаётганини маълум қилганди.
Изоҳ (0)