Farg‘ona viloyati prokuraturasi hamda Bosh prokuratura huzuridagi Iqtisodiy jinoyatlarga qarshi kurash departamenti tomonidan viloyat hududidagi dehqon bozorlarida narx-navo barqarorligini ta’minlash, sanitariya va epidemiyaga qarshi kurashish qoidalariga rioya etilishi hamda oziq-ovqat mahsulotlari zaxirasini yaratilishi borasida nazorat tadbirlari o‘tkazilmoqda. Bu haqda O‘zA xabar berdi.
Xususan, 2020-yil 18-oktabr kuni tuman va shaharlar hududlarida o‘tkazilgan nazorat tadbirlarida 18 ta holatda oziq-ovqat, qishloq xo‘jalik mahsulotlarini asossiz va qimmat narxlarda sotish, sanitariya talablarini buzish holatlari aniqlanib, tegishli hujjatlar rasmiylashtirilgan.
Ma’lum qilinishicha, Bag‘dod tumanidagi dehqon bozori hududida fuqaro A.N. belgilangan tartibda davlat ro‘yxatidan o‘tmasdan, qimmat narxda, ya’ni 62 ming so‘mdan mol go‘shti sotayotganligi aniqlanib, unga nisbatan ma’muriy huquqbuzarlik hujjatlari rasmiylashtirilgan. Yozyovon tumani dehqon bozori hududida fuqaro T.M. belgilangan tartibda davlat ro‘yxatidan o‘tmasdan, shakar mahsulotini qimmat narxda, ya’ni 7500 so‘mdan sotayotganligi aniqlanib, unga nisbatan tegishli chora ko‘rilgan.
Dehqon bozorlari va yirik savdo obyektlarida o‘tkazilgan nazorat tadbirlarida 149 ta holatda aholiga oziq-ovqat hamda qishloq xo‘jalik mahsulotlarini asossiz va qimmat narxlarda sotish, sanitariya va karantin qoidalariga rioya etmaslik holatlari aniqlanib, aybdor shaxslarga nisbatan hujjatlari rasmiylashtirilgan.
O‘tkazilayotgan tadbirlar davomida 476 nafar tadbirkorlik subyekti bilan profilaktik suhbatlar o‘tkazilib, 30 nafar mansabdor shaxslar qonun buzilishga yo‘l qo‘ymaslik yuzasidan rasman ogohlantirilgan.
Ko‘rilgan profilaktik choralarga qaramasdan, ayrim mansabdor shaxslar tomonidan bozorlar hududida sanitariya va epidemiyaga oid qonun hujjatlari ijrosini to‘liq ta’minlamaganlik holati aniqlanib, sanitariya-epidemiologik tekshiruv natijalari bo‘yicha 5 nafar mansabdor shaxsga nisbatan ma’muriy huquqbuzarlik hujjatlari rasmiylashtirilgan.
Xabar berilishicha, Beshariq dehqon bozori hududida turg‘un savdo rastalarida karantin qoidalariga rioya qilish choralari ko‘rilmaganligi aniqlanib, bozor ma’muriyatiga nisbatan ma’muriy javobgarlik to‘g‘risida ish qo‘zg‘atilib, jazo muqarrarligi ta’minlandi.
O‘zA xabariga ko‘ra, nazorat tadbirlari bilan birga viloyat hududidagi dehqon bozorlarda mahsulotlarning arzonlashtirilgan savdo yarmarkalari tashkil etilib, aholiga arzon va sifatli mahsulotlar yetkazib berish choralari ko‘rilmoqda.
Farg‘ona viloyati prokuratura organlari tomonidan hozirda asosiy turdagi qishloq xo‘jaligi mahsulotlarini zaxiraga jamg‘arish ishlarini tizimli tashkil etish, iste’mol bozoriga mahsulot yetkazib berilishini monitoring qilish hamda narx navoni asossiz o‘sishiga yo‘l qo‘ymaslik yuzasidan tadbirlar davom ettirilmoqda.
Eslatib o‘tamiz, Shavkat Mirziyoyev raisligida 16-oktabr kuni oziq-ovqat xavfsizligini ta’minlash va ichki bozorda narx-navo barqarorligini saqlash chora-tadbirlari yuzasidan videoselektor yig‘ilishi o‘tkazildi. Unda go‘sht, tuxum, o‘simlik yog‘i va shakar narxining keskin o‘sishi aholining noroziligiga sabab bo‘layotgani ta’kidlandi. Prezident barcha oziq-ovqat mahsulotlarining zaxirasi bo‘lishi kerakligini, bu davlat siyosatiga aylanishi lozimligini ta’kidladi.
Shundan so‘ng Toshkent shahrida go‘sht narxiga cheklov o‘rnatilgani ma’lum bo‘ldi.
Izoh (0)