Фарғона вилояти прокуратураси ҳамда Бош прокуратура ҳузуридаги Иқтисодий жиноятларга қарши кураш департаменти томонидан вилоят ҳудудидаги деҳқон бозорларида нарх-наво барқарорлигини таъминлаш, санитария ва эпидемияга қарши курашиш қоидаларига риоя этилиши ҳамда озиқ-овқат маҳсулотлари захирасини яратилиши борасида назорат тадбирлари ўтказилмоқда. Бу ҳақда ЎзА хабар берди.
Хусусан, 2020 йил 18 октябрь куни туман ва шаҳарлар ҳудудларида ўтказилган назорат тадбирларида 18 та ҳолатда озиқ-овқат, қишлоқ хўжалик маҳсулотларини асоссиз ва қиммат нархларда сотиш, санитария талабларини бузиш ҳолатлари аниқланиб, тегишли ҳужжатлар расмийлаштирилган.
Маълум қилинишича, Бағдод туманидаги деҳқон бозори ҳудудида фуқаро А.Н. белгиланган тартибда давлат рўйхатидан ўтмасдан, қиммат нархда, яъни 62 минг сўмдан мол гўшти сотаётганлиги аниқланиб, унга нисбатан маъмурий ҳуқуқбузарлик ҳужжатлари расмийлаштирилган. Ёзёвон тумани деҳқон бозори ҳудудида фуқаро Т.М. белгиланган тартибда давлат рўйхатидан ўтмасдан, шакар маҳсулотини қиммат нархда, яъни 7500 сўмдан сотаётганлиги аниқланиб, унга нисбатан тегишли чора кўрилган.
Деҳқон бозорлари ва йирик савдо объектларида ўтказилган назорат тадбирларида 149 та ҳолатда аҳолига озиқ-овқат ҳамда қишлоқ хўжалик маҳсулотларини асоссиз ва қиммат нархларда сотиш, санитария ва карантин қоидаларига риоя этмаслик ҳолатлари аниқланиб, айбдор шахсларга нисбатан ҳужжатлари расмийлаштирилган.
Ўтказилаётган тадбирлар давомида 476 нафар тадбиркорлик субъекти билан профилактик суҳбатлар ўтказилиб, 30 нафар мансабдор шахслар қонун бузилишга йўл қўймаслик юзасидан расман огоҳлантирилган.
Кўрилган профилактик чораларга қарамасдан, айрим мансабдор шахслар томонидан бозорлар ҳудудида санитария ва эпидемияга оид қонун ҳужжатлари ижросини тўлиқ таъминламаганлик ҳолати аниқланиб, санитария-эпидемиологик текширув натижалари бўйича 5 нафар мансабдор шахсга нисбатан маъмурий ҳуқуқбузарлик ҳужжатлари расмийлаштирилган.
Хабар берилишича, Бешариқ деҳқон бозори ҳудудида турғун савдо расталарида карантин қоидаларига риоя қилиш чоралари кўрилмаганлиги аниқланиб, бозор маъмуриятига нисбатан маъмурий жавобгарлик тўғрисида иш қўзғатилиб, жазо муқаррарлиги таъминланди.
ЎзА хабарига кўра, назорат тадбирлари билан бирга вилоят ҳудудидаги деҳқон бозорларда маҳсулотларнинг арзонлаштирилган савдо ярмаркалари ташкил этилиб, аҳолига арзон ва сифатли маҳсулотлар етказиб бериш чоралари кўрилмоқда.
Фарғона вилояти прокуратура органлари томонидан ҳозирда асосий турдаги қишлоқ хўжалиги маҳсулотларини захирага жамғариш ишларини тизимли ташкил этиш, истеъмол бозорига маҳсулот етказиб берилишини мониторинг қилиш ҳамда нарх навони асоссиз ўсишига йўл қўймаслик юзасидан тадбирлар давом эттирилмоқда.
Эслатиб ўтамиз, Шавкат Мирзиёев раислигида 16 октябрь куни озиқ-овқат хавфсизлигини таъминлаш ва ички бозорда нарх-наво барқарорлигини сақлаш чора-тадбирлари юзасидан видеоселектор йиғилиши ўтказилди. Унда гўшт, тухум, ўсимлик ёғи ва шакар нархининг кескин ўсиши аҳолининг норозилигига сабаб бўлаётгани таъкидланди. Президент барча озиқ-овқат маҳсулотларининг захираси бўлиши кераклигини, бу давлат сиёсатига айланиши лозимлигини таъкидлади.
Шундан сўнг Тошкент шаҳрида гўшт нархига чеклов ўрнатилгани маълум бўлди.
Изоҳ (0)