Eronda pandemiya boshidan buyon COVID-19 oqibatida yuzaga kelgan o‘limlar soni bo‘yicha kunlik antirekord qayd etildi. Bir kunda kasallik asoratlaridan 337 kishi halok bo‘ldi. Bu haqda Eron Sog‘liqni saqlash vazirligiga tayanib, “Interfaks” xabar berdi.
Worldometer sayti ma’lumotlariga ko‘ra, bu 18-oktabr kuni qayd etilgan ko‘rsatkichdan 85 kishiga ko‘proqdir.
Eron Sog‘liqni saqlash vazirligi vakili Sima Sadat Larining ma’lumotlariga ko‘ra, mamlakatda koronavirus oqibatida vafot etganlar soni 30 712 kishiga yetdi.
Bundan tashqari, so‘nggi 24 soat ichida Eronda koronavirus bilan kasallanish bo‘yicha 4251 ta yangi holat qayd etilgan, mamlakatda pandemiya boshidan buyon 534 631 kishi koronavirusga chalingan.
Mamlakat sog‘liqni saqlash organlarining ogohlantirishicha, agar aholi koronavirusga qarshi kurash qoidalariga amal qilishni to‘xtatsa, har kunlik o‘lim holatlari soni 600 taga yetishi mumkin.
Eron poytaxti Tehron shahrida 3-oktabrdan buyon karantin cheklovlari kuchaytirilgan: maktab, masjid, do‘kon, restoran va odamlar to‘planadigan boshqa muassasalar yopilgan. Bundan tashqari, niqob taqish majburiy etib belgilangan, tartibni buzganlar esa jarimaga tortiladi.
G‘arb OAVlariga ko‘ra, mamlakat hukumati COVID-19 tarqalishi yuqori bo‘lgan boshqa yirik shaharlarda ham xuddi shunday cheklovlarni joriy qilishni rejalashtirmoqda.
Izoh (0)