Эронда пандемия бошидан буён COVID-19 оқибатида юзага келган ўлимлар сони бўйича кунлик антирекорд қайд этилди. Бир кунда касаллик асоратларидан 337 киши ҳалок бўлди. Бу ҳақда Эрон Соғлиқни сақлаш вазирлигига таяниб, «Интерфакс» хабар берди.
Worldometer сайти маълумотларига кўра, бу 18 октябрь куни қайд этилган кўрсаткичдан 85 кишига кўпроқдир.
Эрон Соғлиқни сақлаш вазирлиги вакили Сима Садат Ларининг маълумотларига кўра, мамлакатда коронавирус оқибатида вафот этганлар сони 30 712 кишига етди.
Бундан ташқари, сўнгги 24 соат ичида Эронда коронавирус билан касалланиш бўйича 4251 та янги ҳолат қайд этилган, мамлакатда пандемия бошидан буён 534 631 киши коронавирусга чалинган.
Мамлакат соғлиқни сақлаш органларининг огоҳлантиришича, агар аҳоли коронавирусга қарши кураш қоидаларига амал қилишни тўхтаца, ҳар кунлик ўлим ҳолатлари сони 600 тага етиши мумкин.
Эрон пойтахти Теҳрон шаҳрида 3 октябрдан буён карантин чекловлари кучайтирилган: мактаб, масжид, дўкон, ресторан ва одамлар тўпланадиган бошқа муассасалар ёпилган. Бундан ташқари, ниқоб тақиш мажбурий этиб белгиланган, тартибни бузганлар эса жаримага тортилади.
Ғарб ОАВларига кўра, мамлакат ҳукумати COVID-19 тарқалиши юқори бўлган бошқа йирик шаҳарларда ҳам худди шундай чекловларни жорий қилишни режалаштирмоқда.
Изоҳ (0)