Ispaniya shimolidagi avtonom viloyat hisoblanadigan Navarra hududida koronavirus tarqalishini to‘xtatish uchun mahalliy rasmiylar hududga kirish va chiqishni butunlay to‘xtatishga qaror qildi. Bu haqda Meduza xabar berdi.
Navarraga kirish va chiqishga ish, o‘qishga borayotganlar, qarindoshinikidan ketayotganlarga va boshqa kechiktirib bo‘lmaydigan holatdagi kishilarga ruxsat etiladi. Cheklovlar 22-oktabrdan kuchga kiradi va 14 kun, ya’ni 4-noyabrgacha amalda bo‘ladi.
Qayd etilishicha, Navarra Ispaniyadagi kirish va chiqishni to‘liq yopishga qaror qilgan birinchi viloyat bo‘ldi. Avvalroq Ispaniyada faqat alohida shaharlar yopilgandi, biroq bu holat viloyatlar uchun yuz bermagandi.
Shuningdek, 19-oktabr kuni Ispaniyaning boshqa hududlari ham koronavirusga qarshi cheklovlarni e’lon qilgan. Kastiliya-Leon avtonom viloyatidagi Burgos, Aranda-de-Duero shaharlari yopiladi. Aragon shahrida barlardagi tashrif buyuruvchilar sonini cheklash va do‘konlarda tunda spirtli ichimlik sotishni taqiqlash haqida qaror qabul qilingan, Kataloniyada esa tun-u kun ishlaydigan kompaniyalarga soat 22:00 dan 07:00 gacha ishlash taqiqlandi.
Ispaniyada 19-oktabr holatiga ko‘ra, 974 449 kishida koronavirus aniqlangan, ulardan qariyb 34 ming nafari vafot etgan. Ispaniya kasallanganlar soni bo‘yicha G‘arbiy Yevropada yetakchi hisoblanadi va butun dunyoda oltinchi o‘rinni egallab turibdi.
Izoh (0)