Qashqadaryo viloyatining Dehqonobod tumanida turmush o‘rtog‘i tomonidan tazyiq va zo‘ravonlikka uchrab kelgan 27 nafar ayolga himoya orderi berilgan. Bu haqda “Daryo”ga tuman IIB boshlig‘i o‘rinbosari Dilshod Mirzayev ma’lum qildi.
Ta’kidlanishicha, tumanda 27 nafar zo‘ravonlikka uchragan ayolga himoya orderi rasmiylashtirib, ularga nisbatan jismoniy va ruhiy bosim o‘tkazgan shaxslar bilan profilaktik suhbat ham tashkil etilgan. Ularning oilaviy muhiti o‘rganilgan.
Tuman markazida istiqomat qiluvchi fuqaro Ch.R doimiy ravishda spirtli ichimlik iste’mol qilib, turmush o‘rtog‘i S.G.ga jismoniy kuch ishlatgan. Ruhiy tazyiq o‘tkazib, farzandlari ko‘z o‘ngida ayolini xo‘rlagan. Buni aniqlagan hudud profilaktika inspektori tashabbusi bilan kelgusida salbiy oqibatlar kelib chiqishining oldini olish va ushbu oilani sog‘lomlashtirish maqsadida S.G.ga himoya orderi rasmiylashtirib berilgan.
Shuningdek, fuqaro B.Z.ning oilasida ham kichik kelishmovchilik katta janjalga sabab bo‘lgani, ushbu oila o‘rganilganda er-xotin o‘rtasida rashk tufayli muntazam janjal bo‘layotganligi va ushbu janjal sabab er xotiniga muntazam ruhiy va jismoniy tazyiq o‘tkazib kelayotgani aniqlangan. Fuqaro B.Z.ning turmush o‘rtog‘i A.A.ga himoya orderi rasmiylashtirib, oiladan mahalla va oilani qo‘llab-quvvatlash bo‘limi mas’ullari va mahalla faollaridan iborat murabbiylar xabar olib turishi, oilani sog‘lomlashtirish masalasi ko‘rilmoqda.
Eslatib o‘tamiz, avvalroq tumanda 39 yoshli xotinini notanish erkakdan rashk qilgan er uni urib o‘ldirib qo‘ygani, Q.F. ismli shaxs esa shar’iy nikohidagi ayoli M.A.ni avval bo‘g‘ib, so‘ngra g‘isht bo‘lagi bilan urib o‘ldirgani, so‘ngra jasadini kul uyumiga ko‘mgani haqida xabar berilgandi.
Izoh (0)