Farg‘ona viloyatining sobiq hokimi Shuhrat G‘aniyev bosh vazir o‘rinbosari lavozimiga tayinlangani munosabati bilan Oliy Majlis Senati a’zoligidan chiqarildi. Bu haqda Markaziy saylov komissiyasi xabar berdi.
Markaziy saylov komissiyasi qaroriga ko‘ra, Oliy Majlis Senati a’zosi Shuhrat G‘aniyev O‘zbekiston Prezidentining 2020-yil 24-sentabrdagi PF-6069-son farmoniga asosan O‘zbekiston bosh vazirining agrar va oziq-ovqat sohalarini rivojlantirish masalalari bo‘yicha o‘rinbosari lavozimiga tasdiqlanganligi munosabati bilan u Oliy Majlis Senati a’zolari ro‘yxatidan chiqarilgan deb hisoblanadi.
Ta’kidlanishicha, mazkur qaror Oliy Majlis Senati hamda xalq deputatlari Farg‘ona viloyati kengashiga yuborilgan.
Shuhrat G‘aniyev 2011—2012-yillarda Farg‘ona viloyati hokimi vazifasini bajaruvchi bo‘lgan, 2012-yildan buyon Farg‘ona viloyati hokimi sifatida ishlagan.
Shuhrat G‘aniyev 2020-yil fevralidan buyon bosh vazir o‘rinbosari lavozimida ishlab, sentabr oyida koronavirus oqibatida vafot etgan O‘ktam Barnoyev o‘rnini egallagandi. 25-sentabr kuni Qonunchilik palatasi deputatlari bosh vazirning agrar va oziq-ovqat sohalarini rivojlantirish masalalari bo‘yicha o‘rinbosari lavozimiga Shuhrat G‘aniyev nomzodini ma’qullagan, 29-sentabr kuni esa Prezident Shuhrat G‘aniyevni bosh vazir o‘rinbosari lavozimiga tasdiqlagandi.
Avvalroq Shuhrat G‘aniyev koronavirus bilan kasallangani to‘g‘risida xabar berilgandi.
Izoh (0)