O‘zbekiston tashqi ishlar vaziri Abdulaziz Komilov 2020-yilning 14-oktabr kuni Hindistonning yangi tayinlangan favqulodda va muxtor elchisi Manish Prabhatni qabul qildi. Bu haqda Tashqi ishlar vazirligi xabar berdi.
Ta’kidlanishicha, vazir ishonch yorliqlari nusxalarini qabul qilib olar ekan, do‘st Hindiston mamlakati elchisini qutladi, uni yuqori va mas’uliyatli lavozimga tayinlangani bilan tabrikladi hamda samarali faoliyat tiladi.
Suhbat davomida siyosiy, savdo-iqtisodiy, investitsiya, madaniy-gumanitar va boshqa sohalardagi ikki tomonlama munosabatlarning holati hamda rivojlanish istiqbollari ko‘rib chiqildi.
O‘zbekiston—Hindiston munosabatlari rivojlanishning sifat jihatidan yangi bosqichiga ko‘tarilib, ijobiy sur’at kasb etayotgani qayd etildi. Oliy darajadagi muntazam muloqotlar ikki tomonlama strategik sheriklikni mustahkamlashga zamin yaratmoqda.
Tomonlar turli darajalarda bo‘lib o‘tadigan qo‘shma tadbirlar jadvali bo‘yicha fikr almashdi. Xususan, ikki mamlakat tashqi ishlar idoralari o‘rtasida navbatdagi siyosiy maslahatlashuvlarni o‘tkazish taklif qilindi.
Koronavirus pandemiyasining ikki tomonlama savdo-iqtisodiy munosabatlarga salbiy ta’siri oldini olish va o‘zaro savdo hajmini yanada oshirish yuzasidan qo‘shimcha choralar ko‘rish zarurligi ta’kidlandi.
Tibbiyot, farmatsevtika, ta’lim va innovatsiya sohalarida investitsiya loyihalarini amalga oshirishni davom ettirish masalalariga alohida e’tibor qaratildi.
O‘zbekiston va Hindiston o‘rtasida sayyohlik almashinuvini qayta tiklash, o‘zaro sayyohlar oqimini oshirishga qiziqish bildirildi.
Eslatib o‘tamiz, Hindistonning O‘zbekistondagi avvalgi elchisi Santosh Ja 2020-yilning iyul oyida diplomatik missiyasini yakunlagandi.
Avvalroq Abdulaziz Komilov Pokistonning O‘zbekistondagi yangi elchisi Sayid Ali Asad G‘iloniydan ishonch yorliqlari nusxalarini qabul qilib olgandi.
Izoh (0)