Қашқадарё вилоятининг Деҳқонобод туманида турмуш ўртоғи томонидан тазйиқ ва зўравонликка учраб келган 27 нафар аёлга ҳимоя ордери берилган. Бу ҳақда «Дарё»га туман ИИБ бошлиғи ўринбосари Дилшод Мирзаев маълум қилди.
Таъкидланишича, туманда 27 нафар зўравонликка учраган аёлга ҳимоя ордери расмийлаштириб, уларга нисбатан жисмоний ва руҳий босим ўтказган шахслар билан профилактик суҳбат ҳам ташкил этилган. Уларнинг оилавий муҳити ўрганилган.
Туман марказида истиқомат қилувчи фуқаро Ч.Р доимий равишда спиртли ичимлик истеъмол қилиб, турмуш ўртоғи С.Г.га жисмоний куч ишлатган. Руҳий тазйиқ ўтказиб, фарзандлари кўз ўнгида аёлини хўрлаган. Буни аниқлаган ҳудуд профилактика инспектори ташаббуси билан келгусида салбий оқибатлар келиб чиқишининг олдини олиш ва ушбу оилани соғломлаштириш мақсадида С.Г.га ҳимоя ордери расмийлаштириб берилган.
Шунингдек, фуқаро Б.З.нинг оиласида ҳам кичик келишмовчилик катта жанжалга сабаб бўлгани, ушбу оила ўрганилганда эр-хотин ўртасида рашк туфайли мунтазам жанжал бўлаётганлиги ва ушбу жанжал сабаб эр хотинига мунтазам руҳий ва жисмоний тазйиқ ўтказиб келаётгани аниқланган. Фуқаро Б.З.нинг турмуш ўртоғи А.А.га ҳимоя ордери расмийлаштириб, оиладан маҳалла ва оилани қўллаб-қувватлаш бўлими масъуллари ва маҳалла фаолларидан иборат мураббийлар хабар олиб туриши, оилани соғломлаштириш масаласи кўрилмоқда.
Эслатиб ўтамиз, аввалроқ туманда 39 ёшли хотинини нотаниш эркакдан рашк қилган эр уни уриб ўлдириб қўйгани, Қ.Ф. исмли шахс эса шаръий никоҳидаги аёли М.А.ни аввал бўғиб, сўнгра ғишт бўлаги билан уриб ўлдиргани, сўнгра жасадини кул уюмига кўмгани ҳақида хабар берилганди.
Изоҳ (0)